ZALEN Jan 26, 2026: Mizoram Journalist Association (MJA) chuan Republic Day, Aizawl a lawmna, vawiin a an thil tawn chu thleng nawn tawh lo se an duh.

Thuchhuah an siamah MJA chuan, "India ram ni pawimawh Republic Day leh Independence Day-ah sawrkar thuneitute'n press mite pawimawhna hriain, duhsak takin kum tam tak chhung chu press mite tan thutna bik 'Press Enclosure/Gallery' min siamsak thin a, kan lawm em em a ni," an ti a.

"Hetih lai hian, kumin 2026-ah erawh chuan Lammual, Aizawla Republic Day lawmnaah 'Press Enclosure/Gallery' siam a ni lo tih Aizawl DC Office-a officer-te hnen atangin hriat a ni a, a hmunah finfiah a ni bawk. Republic Day ngai pawimawha press mi kalte'n thutna remchang tha kan nei ta lo a ni. Republic Day lawm dan tur rêlnaah MJA aiawh kan tel a, kan duh dan leh kum hmasa lama harsatna kan lo tawhte chiang taka sawi chhuah a ni chunga Press Enclosure/Gallery siam a ni lo hi a pawi kan ti hle," an ti bawk.

MJA chuan hetiang hi thil awm dan a nih avangin Republic Day lawmnaa tel tuma Lammuala kal press mite chu an haw leh tih tarlang bawkin, hetianga kal a ngai ta chu a pawi an ti tak zet tih an tarlang.

Kumin 2026-a Republic Day lawmna leh Governor's At Home-a tel tura sawmna inpek danah pawh thil fel lo, thil nih dan phung ni lo a awm nual tih tarlangin; hei pawh hi a zialo an tih thu an tarlang a.

"Heng harsatna hrang hrangte hi tun hnuah chuan thleng tawh lo se MJA chuan kan duh tak zet a; national day - Republic Day leh Independence lawmna rêng rêngah Press Enclosure/Gallery siam zel turin sawrkara mawhphurtute kan ngen a ni," an ti bawk.

#ZalenNews