Aizawl; Mizoram Journalist Association chuan Mizoram House leh Guest House hrang hranga thlenna chung changah sawrkar thupek dinglai chu zawm an duh tih an sawi. Nimina thuchhuah an siamah MJA chuan North East hmun engemawzat leh Kolkata te fang tura press tour neia zin mek, Mamit District MJA member te leh anmahni tawiawmtu, MJA Gen. Hqrs aiawh leh IPRO te chu October 16, 2014 a Guwahati Mizoram House a room ruahmansak an nih danah, sorkar thu dinglai pawisak lohna lian tak awm nia sawiin MJA Gen. Hqrs chu a lawm lo hle tih an sawi a. Thuchhuah tarlan danin Press Team te hian Guwahati Mizoram House hi Oct. 16, 2014 (Ningani) tlai dar 5 ah an thleng a, House Staff pakhatin an thlenna atana Room pangngai pakhat leh khum 10 awmna Dormitory an ruahman thu lo hrilhin, room dang chu a khat vek niin a sawi a. Press Team te thlen nan hian October 8, 2014 khan GAD atangin reservation tih thlap a niin, sorkar thu dinglai anga Official on Duty a Group ‘A’ Officer tlukpuia enkawl tur ni si Dormitory a inhnawhkhawm tura tih an ni chu a lungawithlak loh hle a ni an ti a. MJA chuan Press Team ten Mizoram House an thlen lai hian Deputy Resident Commissioner Pu R. Lalremsanga chu a hmel hmuh tur a awm loh bakah, phone a biakpawh tuma nasa taka beihna pawh a hlawhtling lova. Hetih laia mikhual thleng mekte list enin, Deputy RC hian duh se chuan Press Team te tan hian room pangngai ve deuh chu a ruahman theiah MJA chuan a ngai a. Tihngaihna a awm ngang lo a nih pawhin tawngkam tha a inhrilhfiah ni se MJA chuan a hrethiam thei em em dawn a. Chutiang intuamdamna lam hawi tawngkam khat mah Dy.RC hnen atanga hriat a ni lo leh, vawi tam biak tum pawha phone inlak duh loh khum hi Journalist te hmuhsitnaah MJA chuan a ngai a. Accredited Journalist ten sorkara hamthatna an neih ve chhun leh, sorkar pawhin ziaka a dahsak ve thlap palzut tumna leh engamaha ngaih lohna awm nia lang hi MJA chuan na a tiin pai daih harsa a ti hle a ni. MJA thuchhuah chuan hetih lai hian Shillong Mizoram House Deputy Resident Commissioner Pu Jakob Lalawmpuia’n Press Team te tha taka lo dawngsawng a, VIP Team mikhual an lo nei mek chung pawha room awm thei ang ang a lo ruahmansak leh, a leng bak pawh a hnaivaia thlenna tur a lo zawnsak avang te, Press Team te zanriah tuihnai tak a lo buatsaihsak avangin a chungah MJA in lawmthu a sawi a ni, an ti a. GAD chuan Accredited Journalist te chu an hna kaihhnawih thila zin an nih chuan Official on Duty-in, Mizoram sorkara Group ‘A’ service te ang chiaha enkawl tur, tih order a chhuah tih sawiin he Office Memorandum hi hre thara ngai pawimawh turin Mizoram House enkawltu zawng zawngte a ngen thar leh tih an sawi bawk.