ZALEN January 28, 2026: Home Minister K.Sapdanga leh I&PR Minister B. Lalchhanzova te chuan Home Minister Office Chamber-ah Kum 2026 Republic Day lawmna inkhawma chanchinbumite lungawilohna te bawhzuiin vawiin khan Republic Day Organising Department zinga mawhphurhtu - Aizawl Deputy Commissioner Office, State Protocol Office leh Directorate of Information & Public Relations hotute an kawm.

He hunah hian IPRP&S Secretary Betsy Zothanpari Sailo, Aizawl Bawrhsap Er. Lalhriatpuia, State Protocol Officer Lalmuansanga Ralte, DIPR Joint Director pahnih – Mina Zoliani Joute leh Malsawmsanga, DIPR Deputy Director Andrew H. Lalremruata te an tel a ni.

Home Minister K.Sapdanga chuan Republic Day lawmna inkhawm leh “Governor’s At Home” chungchanga chanchinbumite’n lungawi lohna leh harsatna an nei chu pawi a tih thu sawiin, he thil thleng chungchanga ngaihtuah ngai leh ennawn ngaite sawiho a pawimawh avanga inkokhawm an nih thu a sawi a, hun lo kal leh zel turah felfai zawka ruahmanna kalpui a nih theih nan a huaihawttu sawrkar official-te nen sawiho a pawimawh tih thuhma a sawi a ni.

IPRP&S Minister B. Lalchhanzova chuan Chanchinbumite chu Sawrkar hunpui leh pawimawh ti phuisuitu leh tizahawmtu a ni a. Hetianga ruahmanna fumfe loh avanga harsatna an tawk hi pawi a tih thu a sawi. I&PR Minister chuan chanchinbumite lungawilohna an hriat rualin official lam thu leh hla hriat a pawimawh tel tih sawiin, a inchotuah zawng ni lova a zaizap zawnga indawr tawn a pawimawh tih sawiin, that leh that inlawm tawn a, harsatna kan tawh kara hma kan sawn zawk theihna tur zawn thiam a pawimawh a, thil tha zawk he kan thil tawn atang hian a lo chhuah kan beisei a ni a ti bawk.

Aizawl Bawrhsap Er. Lalhriatpuia pawhin chanchinbumite lungawi lohna lo thleng chu pawi a tih thu sawiin, anmahni lam pawh an inchhui let nasa a, an naute zinga inzilh ngai leh inhrilhfiah ngaite pawh hma an lak tawh thu a sawi a, a tul ang zela hma lak a nih tur thu leh tun hnuah chuan uluk leh fimkhur zawka hma an lak tawh tur thu a sawi a ni.

Aizawl DC kaihhruaina hnuaiah Protocol Office leh Directorate of Information & Public Relations ten hun remchang hmasa berah MJA hruaitute kawma inpawh tlang taka sawihona neih tha an ti a, Republic Day leh Independence Day-ah Media enclosure siam ziah tawh nise an ti bawk a, sawmna semchhuah chungchangah pawh fimkhur lehzuala kalpui nise an ti bawk.