October 16, 2023; Mizoram Kohhran Hruaitute Committee (MKHC) chuan November 7, 2023-a Mizoram inthlanpui neih tur pualin nimin khan thuchah an tichhuak a, zawlnei der leh zawlthupuan hnawl nachang hre tur leh political party-te pawh hetiang thupuan ang chi reng reng hmanrua atan hmang lo turin an ngen.

MKHC INTHLAN THUCHAH

1. Inthlanna thianghlim leh zalen taka mi tinin mahni duh zawng thlan a nih theih nan political party zawng zawngte'n hel pawl rawih emaw, invau leh ralthuam lam chi emaw hman loh ni se.

2. Candidate-te'n inthlan dawna vote leina anga ngaih theih sum leh thil dang sem emaw, pek emaw tih loh ni se.

3. Kohhran leh khawtlang inpumkhatna leh inunauna tichhe thei - hnam bil emaw, pawl emaw tan political party leh candidate-te'n hma lak loh ni se.

4. Political party tin leh candidate tinte'n tharum thawhna chawk tho thei zawnga tawngkam uchuak tak leh inelsen zawnga mi dang sawichhiat loh ni se, chutiang lam hawi reng reng chu social media-ah vawrh darh loh ni se.

5. Political party-te'n a taka tih theih loh tur zuara mipui bumna ang thil intiam loh ni se.

6. Candidate-te hmalakna tura pawl bik emaw, hnam bik emaw, mi tlemtete hamṭhatna tur emawa intiamtir loh ni se.

7. Mi tu mahin sum leh therhlo hmanga min lei tumtute lakah kan vote (zalenna) hralh loh ni se. Hetianga tih tumtute hnâwl ngam tura tan lak ni se.

8. Political party leh candidate-te'n intihphurna atana ruai ṭheh leh sum seng hnem zawnga hmalak loh

ni se.

9. Kristian ram kan nih angin mipuite'n zawlnei der leh zawlthupuan hnawl nachang hre tur leh political party-te'n hetiang thupuan ang chi reng reng hmanrua atan hman loh ni se.

10. Vote nei zawng zawngte'n kan mawhphurhna a nih ang taka vote thlak vek ni se.

11. Sorkarna siamtu apiang chu kan ram tana Pathian ruat an ni tih mipuite'n kan hriat a, sawiselna tur ringawt ngaihtuah lo a, ram leh hnam tan dik taka hna an thawh theih nana ṭawiawm hi kan bat a ni tih i hre reng ang u.

12. Kan ram hruaitu tur mi ṭha kan thlan chhuah theih nan leh muanawm taka inthlan a nih theih nan Pathian hnenah ṭawngṭaiin ṭan i la zel ang u.