ZALEN October 31, 2023 : Mizoram Kohhran Hruitute Committee chuan NGO Coordination Committee hnenah lehkha thawnin Election Commission of India (ECI) a Election vote chhiarni thlak tura an nawrna a la hlawhtlin loh avangin ngaihtuah nawn pui atan an sawm a, he hunah hian political party te pawh sawm an ni bawk.

MKHC chuan, "Kan hriat theuh angina MLA Election vote chhiarni chu December 3, 2023 (Sunday) Pathian ni ah a tla a. Kristian ten Pathian chibai kan bukni leh niserh a nih avangin Election Commission of India (ECI) ah vote chhiarni sawn tura ngenna thlen a ni a. Amaherawh chu tun thlengin engmah chhanna kan dawn loh avangin, ‘Engtia hmalak zel tur nge ni ang? tih ngaihtuah ho turin MKHC chuan NGO Coordination Committee, MPF leh Political parties te nen joint meeting neih nise tiin a rel a. Meeting hmun atan Synod Office Devotion Hall nise, a hun chu Nov 2, 2023, (Thursday) 7.00 pm a ni ang," tiin an lehkha thawnah hian an tarlang.

He joint meeting-ah hian NGO Coordination Committee atangin OB te leh hemi chhunga awm pawl hrang hrang (YMA, MZP, MSU, MHIP, MUP etc) atangin mi 3 (pathum) aia tlemlo lo tel turin kan sawmin kan ngen a che u.