November thlaa state inthlan neihnaa BJP-in an MP a dintir zinga tling 12 zinga 10-te chuan Nilaini khan parliament member an nihna atanga banna an thehlut hlawm a. An zingah hian union minister pahnih, Narendra Singh Tomar leh Prahlad Patel te pawh an tel a, cabinet atanga bânna pawh an thehlut chhunzawm thuai ang.

Minister of State for Food Processing Patel-a hian news agency ANI hnenah, “MP atangin ka bâng ta a, cabinet atang pawhin ka bâng thuai ang,” a ti.

An bânna hi dan anga ti an nih thu NDTV hnenah a sawi bawk a, ram danpuiin a rualin mi pakhat parliament leh state legislative assembly member nih a khap vang a ni.

MLA atana thlan tlin thar zinga la bâng ve lo pahnihte hi Rajasthan-a bial atanga thlan tlin, Alwar Baba Balaknath leh Chhattisgarh-a Sarguja bial atanga tling, Renuka Singh te an ni a, anni pawh an bâng thuai dawn niin NDTV hi a hrilh bawk.

Nilainia parliament member nihna kalsan ta BJP hruaitu eng emaw zat hi Pathiannia inthlan result chhuak taa hnehna an channa state pathum - Madhya Pradesh, Rajasthan leh Chhattisgarh-a chief minister tura rinkaite pawh an ni hlawm.

BJP hian Nilaini tukah khan an party hotu lawkte chu chief minister tur ngaihtuah hian an thukhawm tawh tih an sawi a. Madhya Pradesh-ah hian chief minister ni lai, Shivraj Chouhan la awm mah se mi thar an dah dawn nia sawi a awm a. State dang pahnih erawh Congress rorelna thin a nih avangin mi thar an ngai hrim hrim.

Chief minister tur ngaihtuah hian Prime Minister Narendra Modi-a chenna, Delhi-ah Union Home Minister Amit Shah leh party boss JP Nadda te chu darkar nga dawn an thukhawm a ni.

State pathuma Congress hnehtu, BJP hian state panga inthlanah MP 21 zet an vawrh chhuak a, an zinga panga chu union minister an ni hlawm a. Rajasthan leh Madhya Pradesh-ah pasarih ve ve, Chhattisgarh-ah pali leh Telangana-ah pathum an dintir a ni.

Telengana-ah hian tute mah an tling zo lo va, chhim lam state-ah hian an che chhe hle a, bial 111 zet chuh mah se bial riatah chauh hnehna an chang phak a, Congress-in sorkarna an chang dawn chiang hle.

Rajasthan-ah BJP MP pathum, Madhya Pradesh-ah pahnih leh Chhattisgarh-ah pakhat an chak zo lo bawk.

Tomar leh Patel bakah Rajasthan-ah Baba Balaknath, Diya Kumari leh Kirori Lal Meena te chuan state inthlan an chuh bawk a, anni pawh hi bang zingah an tel a. Chhattisgarh-ah Vijay Baghel chuan a chuh ve bawk.

Rajasthan atanga bâng ta mi pathum hian hnehna an chan vek laiin Baghel-a hian a patea, chief minister kal chhuak ta, Bhupesh Baghel khingin a hneh lo thung a. Chhattisgarh-ah hian BJP chuan union minister pahnih, Renuka Singh leh Gomti Sai an dintir bawk a. Singh-i hian Bharatpur-Sonahat bialah hnehna changin Sai-i hi Pathalgaon bialah a chak bawk.

Union Minister of State for Tribal Development Faggan Singh Kulaste pawh Madhya Pradesh-a Niwas bialah ding mah se a chak zo lo.

Congress pawhin MP an neih lai an dintir nual a, heng zingah hian Telengana-ah Revanth Reddy leh Uttam Kumar Reddy te pawh an tel a. An pahnih hian tling ve vein ni 14 chhungin khawi zawk nge an thlan dawn tih an tihchian a ngai dawn.

Revanth Reddy-a hi chu a bân ngei hmel tawh a, kum 56 mi, Kodangal biala thlan tlin hi Ninganiah chief minister atan lak luh a ni dawn a ni.

Rajasthan-ah BJP atangin Balaknath, Meena leh Kumari te chu Ashok Gehlot thlaka chief minister tura sawi rik rin mi pasarih zingah an tel.

Madhya Pradesh-ah pawh Patel leh Tomar te chu sorkar hotu ber tura rinkai zinga mi an ni mek bawk.