October 11, 2023; Mizoram Legislative Assembly Speaker Lalrinliana Sailo chuan vawiin khan Assembly Speaker a nihna atanga banna a thehlut a, a banna lehkha hi Commissioner & Secretary Lalhmahruaia Zote in a lo dawng.

Lalrinliana Sailo hian Dy Speaker H Biakzauva hnen ah banna thehlut in, a banna lehkha hi Commissioner in a lo dawng a ni.

Lalrinliana Sailo hi BJP State hruaitute'n an tawiawm a, ruahman lawk ang chuan naktuk tlai dar 4 ah BJP State Office Upper Republic ah BJP a zawm dawn a, he hun hmang tur hian Central hruaitu te an rawn kal ang.

ZALEN thudawn danin, Rina Sailo hi BJP ticket in Mamit bial ah a din rin a ni a, hetihlai hian central lam BJP hruaitute ruahmanna erawh nghah a la ngai dawn.

Lalrinliana Sailo hi kum 2018 khan MNF ticket in Chalfilh bialah thlan tlin a ni a, Mizo politicians zing a senior pawl niin, congress sawrkarah health minister pawh lo ni tawh a ni.

Speaker in banna a thehluh ve leh tak avang hian tunhnai ah MLA 8 in banna an thehlut tawh a, chung zing a 5 te chu ZPM ticket a ding tur MLA 5, Congress member, MNF ticket a Palak bial a ding tur KT. Rokhaw bakah, MNF atanga ban, BJP ticket a Siaha bial a ding tur, minister hlui Dr. K. Beichhua te an ni.