November 2, 2023, Sub Hqrs. YMA, Mamit chuan MLA candidate pakhat thusawi chungchang-ah nimin khan Mamit police station ah thubuai (FIR) an thehlut a. Hetihlai hian Lalpa Chhiahhlawh Intelkhawm/Zoram Thar Zofate Lairelna Inpui hruaitute'n thil awmzia an sawifiah.

Sub Hqrs. YMA, Mamit in FIR a an tarlan danin, tunhnai a video viral, Lalramdingngheti, Lalpa Chhiahhlawh Intelkhawm/Zoramthar hming a Dampa leh Mamit bial a MLA candidate in a campaign na a chi leh chi inkara inhmelmakna thlen thei thudik lo heng - Mizo ten Bru te hmusit leh hnuaichhiah tak anga ngaih theih tura a sawi te, Bru te hi Mizote chhiah hlawh atana Pathian pek anga Mizo history a ziak a nih thu a sawi te leh Bru te hi Mizoram luah hmasatu anga a sawi te hi thudik lo hul hual a ni a, hei hi Sub-Headquarters YMA chuan a ngai thu tak hle a, he thil hi chi leh chi inkara buaina lian zawk thlen thei a nih avangin a sawitu hi min zawn chhuahsak tur leh a tul anga hma min laksak turin kan ngen a che, tiin an tarlang.

He thil thleng chungchang Lalpa Chhiahhlawh Intelkhawm/Zoram Thar Zofate Lairelna Inpui hruaitute sawifiahna : - 

• Tun hnai video viral Pi Lalramdingngheti’n BRU te hnena a thusawi hi Lalpa Chhiahhlawh Intelkhawm te hriatpuina leh pawmpuinaa sawi a ni lo a. Zoram Thar hruaituten mipui te hnenah thupha an chawi a, a thusawi leh zelah fimkhur turin an hriattir.
• Pi Lalramdingngheti pawh Zoram Thar Zawlbuk ah hruaitute nen vawiinah (01.11.2023) inkawmna leh tawngtaina hun neiin, hnam thila inbeihna chawkchhuah tuma sawi ni lovin, hmangaihna rilru nena hnam hrang hrang kan inpumkhat theih zawk nana thahnemngaihna avanga sawi a ni a ti.
• A thu dawn a puanchhuah chu a sawi tum ang taka dawnsawn a ni lo tiin, Zoram mipuite rilru a lo ti na chu pawi a ti takzet a, ngaihdam a dil bawk. A thusawiah a fimkhur tawh tur thu a sawi bawk.