October 27, 2023; MNF media & publicity chuan kum 2021-22, kum hnih chhungin a MLA fund atangin Lalduhoma'n damlo kan nan Rs. 16,42,000 a hmang niin an sawi a, Serchhip bial ZPM leh an MLA te'n sum siam nan MLA fund an hmangah an ngai.

Vawiin a thuthar thehdarhtute an kawmna ah an GS VL. Krosshnehzova chuan, Serchhip MLA Lalduhoma'n MLA fund atanga damlo Zoremsangi, Serchhip Dinthar W/o H. Zoramsiama a kan chungchang a sum chheprelna awm nia an ngaih an puan hnuah, Serchhip Dinthar ZPM VCP H. Zoremsiama'n sum a dawn thu leh a account a a luh ngei thu a sawi ta nia tarlangin, an dawng kim tak tak a, an ta tak tak tur a nih chuan an lawmpui tih a sawi.

"Pi Zoremsangi te hi an sum an account a a luh tuk maiah Rs. 2,30,000 lakchhuah leh nghal a ni a, an account ah chuan a lut ngei a, anmahni ngeiin an dawng tih an sawi na a, anmahni hrechiangtu te chuan an hming a pawisa lokal hi anmahni pual a nih loh an ring thup a ni. An account a pawisa lokal hi anmahni pual a nih miau loh avangin, Pu Duhoma damlo kanna hi Rs. 1000 bak kan dawng lo, tia an lo sawi hi thil awm takah MNF chuan kan ngai a, an account a damlo kanna hming a sum lut hi ZPM party leh an MLA hian sum siam nan an hmang niah MNF chuan kan ngai a ni," a ti.

Kum 2021-22, kum hnih chhungin Lalduhoma'n a MLA fund atangin damlo kan nan Rs. 16,42,000 a hman thu te, MLA fund damlo kan nan a hman tam hle thu te a sawi bawk.