Aizawl: Aizawl South I bialtu MLA R.Vanlalvena chuan nizan hmasa dar 7 khan Bethlehem Vengthlang YMA in an Branch YMA Library-in kum 25 a tlin 'Silver Jubillee' an lawmna a hmanpui. R.Vanlalvena chuan, hmasawnna tluantling leh rintlak nei turin lehkha chhiar leh ziah taimak a tul tih sawiin, “Library chu mitin tan hriatna buhzem a ni a, mipuiten kan hman tangkai thiam a pawimawh,” a ti a. Bethlehem Vengthlang YMA in Mizoram leh India ram district huap ang pawha Library tha lawmmawn dawng phak an nei thei chu tlawmngaia Library enkawltute taimakna leh veng chhung mipuite thawhhona that vang ani tih sawiin, Library chu zirlaite mai ni lo, mipuite pawhin nasa zawka chhawr tangkai a duhthu a sawi bawk. MLA hian Library Computerization a hawng nghal bawk a ni. Bethlehem Vengthlang Branch YMA Library ah hian lehkhabu 9666 awmin, Naupang leh Puitling lehkhabu hawh hun fel tak an siam a, kumin 2016-ah Library member 340 chuang an awm. Bethlehem Vengthlang YMA Library hian Mizoram chhung leh India ram chhung District-a Library tha inelnaah lawmman tum 4 lai an lo la tawh bawk a ni.