Aizawl: School Education department officer leh Mizo tawng lama hma latu pawl hrang hrang hruaitu te chuan Zirtawpni khan Assembly-a Mizo Language Development Board bill pawm champha pualin hun an hmang a, Human Resources Development Board vice chairman Dr. L.Thangmawia chuan a hmanpui. 

He an inkawmhona ah hian Dr. L.Thangmawia chuan nikum March ni 10-a Mizoram State Legislative Assembly-a Mizo Language Development Board bill 2022 pawm anih hnu khan ataka function turin chak taka hmalak a ni a, tunah hian MLDB rules peih a ni tawh tih leh hun rei lote ah hnathawk thei a a awm thuai a beisei tih a sawi.

Mizo Language Development Board hian New Capital Complex ah pisa neiin a taka hna a thawh theih hun ah chuan Mizo tawng humhim leh ti hmasawn tur te, hnam dang tawng Mizo tawnga sengluh dan turte, Mizo Grammar chungchang te, Mizo Literature hmasawnna tur bakah Mizo tawng kaihhnawiha thawh tur awm apiang a thawk dawn a ni.

Mizo Language Development Board office tur hian Mizoram sawrkar chuan AIS Transit Building-2, MINECO, Aizawl-ah a ruahman sak a, office chei hi zawhfel ni tawhin ni ni 6.2.2023 khan MLDB office hi luah tan niin Pathian hnena hlanna hun hman a ni tawh bawk. Tunah hian adhoc-in thawktu pathum dah lailawk nghal a ni a, MLDB Controlling Authority Dr. Lalzirmawia Chhangte chuan Chairman pangngai tur ruat hma atan MLDB Chairman hna hi a lo hmui rih dawn a ni.