ZALEN May 31, 2026: Mizorama zu khapna dan, The Mizoram Liquor (Prohibition) Act, 2019 siam that a nih hnuah local fruit beer siam phalna dilna hun chu thuchhuak ang chuan vawiin thleng hian hawn a ni a, he dan hnuaiah vek hian local fruit beer leh wine sem darhtu nihna pawh dil theih a ni.

Excise & Narcotics Department tar lan danin Mizoramah The Mizoram Liquor Prohibition (MLP) Rules, 2025 chu Mizoram Gazetted extraordinary-ah October 6, 2025 khan tihchhuah a lo ni tawh a. He dan thar hnuaiah hian local fruit beer siam phalna (manufacture) a dil theih a. He dan hnuaiah vek hian local fruit beer leh wine sem darhtu nihna (distributor/stockist) a dil theih bawk.

A dil duh chuan, Commissionerate of Excise & Narcotics, Khatla, Aizawl, Aijal Club opposite-ah leh district hrang hranga Excise & Narcotics Office-ah te ngaihven theih chu vawiin May 31, 2026 hi thuchhuak ang chuan dilna hun tawp ni a ni.

The Mizoram Liquor (Prohibition) Act, 2019 siam thatna, The Mizoram Liquor (Prohibition) Amendment Bill, 2025 chu March 10, 2025 khan Mizoram Legislative Assembly session-ah pawm a lo ni tawh.

Legislative Assembly session-a he bill sawihonaah Excise Minister Lalnghinglova Hmar chuan MLP Act siam that hmangin state dang atanga zu, beer leh wine lutte a hma aia khauh lehzuala do a nih dawn thu te, Mizorama thlai/thei hrang hrang atangin phalna neia wine/beer siam phal a nih dawn thu te, bill chu kuthnathawktute lamtang bill a nih thu te a sawi.

MLP Act hnuaiah hian Mizorama thar sawhthing, balhla, dragon fruit, sapthei, lakhuihthei, sunhlu, kawlthei, theiherawt, gu, lamkhuang, dawnfawh, hmazil leh thlai dangte hmangin fruit beer siam phal a ni dawn a ni.