Aizawl: Mizorama zu khuahkhirhna dan ‘The Mizoram Liqour (Prohibition & Contol) Act, 2014’ hman a nih hnuah zu atangin chhiah Rs. 83,04,87,695 hmuh a ni tawh. MLPC zirchiangtu tur Review & Evaluation Committee hi August ni 9,2016 khan Chief Secretary Conference Hall ah Excise & Narcotics Minister R.Lalzirliana hovin an thukhawm a, meeting ah hian member te an kal tha hle. Zalen palaiin a biak naah Excise & Narcotics Secretary Benjamina chuan meeting ah hian member ten an ngaihdan hrang hrang sawiin zu zawrh hnua zu in Mizo mipuite a nghawng dan zirchiangtu tur Research Committee din rawtna te pawh a awm tih a sawi a; mahse, thu-tlukna mumal erawh siam a ni lo niin a sawi. Excise Secretary chuan Committee chu mipuiin an ngaihchan reng a nih avangin rei rial lova an thutkhawm leh thuai a beisei tih Zalen a hrilh bawk. Zalen thudawn danin Mizoramah zu laluttu 3- SS Enterprise, RTP leh Raphael te awmin zu dawr hawn phalna license nei mi 65 zingah zu dawr hawng 51 an awm mek. Hengte hi Aizawl district-ah 28, Lungleiah 5, Champhaiah 4, Kolasib-ah 5, Serchhipah 6 leh Mamit district-ah 3 te an ni a, Autonomous District Council huamchhungah chuan MLPC Act hi hman a ni ve lo a ni.