Aizawl-a concert nei tur Michael Learns to Rock (MLTR) te chuan nimin khan Mizoram an rawn thleng a, vawiin an hahchawl ang a, naktuk zanah Lammual-ah an concert ang - a pui dawn e! 

Danish soft rock band lar MLTR hian 'Back On The Road' tour nei turin India an rawn pan a, tour kick-off nan Aizawl an rawn thlang a ni. India khawpui hrang hrang pasarihah concert hi an nei dawn a, Aizawl bakah hian, hmarchhak khawpui dang - Guwahati, Dimapur leh Shillong-ahte pawh concert hi an nei dawn a ni. 

Sound lam pawh a changtlung viau dawn a, hmarchhaka sound system nei tha ber tih ngam Delta Sound ten an hmanraw tha ber ber an lo chhawpchhuak dawn. Delta Sound hian internation band - Smokie, Mr. Big, Firehouse leh Scorpions te pawh an lo dawngsawng tawh a, Bryan Adams leh Eric Martin te pawh an lo set sak tawh - sound lamah lungngaihna tur a awm lo.

Concert tan hmaa local artist zai tur thlan chungchangah inhnialna a tam hle a, a boruak 'hot' zia tilangtu a tih theih awm e. Concert tan hmaa lo zai tur mai an nih avangin tupawh zai se mipui an chawk hlim a nih chuan a tha vek mak. Hemi chungchangah hian Mimi Renthlei chuan Facebook lamah post a siam a, "Kum 2005 Khan MLTR concert Shillong-ah khan opening act kha kan ni a, soundtrack hmang lo tan chuan a ngaihna a awm vak lo. An instrument khawih an phal lo a, midang tan in set up vak a rem tawh bawk si lo," tiin inhnialna awm mek karah thu leh hla a lo nei ve. 

Rosy K. Remsangpui pawhin, "MLTR concert opening-ah ka zai dawn loh avanga vuipuina message ka dawng nasa hle. Kan Mizo pui ten min duhsak hian ka ngai hlu hle a, mahse hnamdangin min lo ngaihhlut a min lo sâwm thin hi ka ngai hlu zual! A chhan chu in hmelhriat that vang leh induhsakna vang engmah awm lo a, zai/vocal lam ngawr ngawr avangin min sâwm tih a chiang thin a, chu chu zaimi in ti tan chuan chu aia hlu leh ropui a awm bik chuang lo!" 

"Lammual-a MLTR concert en ve ka tum e, in hmu suau suau ang u aw! MLTR kan zaipui dual dual dawn nia. Kan local artist te pawh support vek ang u, mahni leh mahni in support tlân i zir ang u. An ruat ang ang te tha taka perform turin duhsakna ka hlan vek e. Mizoram tan zel aw!" tiin, Facebook-ah a post ve bawk.