Danish soft rock band lar Michael Learns to Rock (MLTR) chuan India-ah tour an nei dawn a, khawpui hrang hrangah concert an nei ang. MLTR hian Meghalaya pawh an thlawh dawn a, 'Me’gong Festival' ah an perform dawn a ni. 

MLTR hian '25 Live Anniversary Celebration Tour' an nei mek a, hemi kal zelah hian India pawh an rawn pan dawn a ni. Member pathum - Jascha Richter, Mikkel Lentz leh Kåre Wanscher te awmna MLTR band hian December 11 atangin India ah tour an nei tan dawn a, khawpui an tlawh tur zingah hian hmarchhak khawpui Guwahati leh Dimapur te pawh an tel. 

A hmasa ber atan Kingdom of Dreams, Gurgaon, Delhi-ah an concert ang a, heta tang hian Guwahati an pan ang. December 15-ah Nagaland khawpui Dimapur-ah an concert ang a, Kolkata (December 17) leh Goa (December 19) ahte show an nei bawk ang. 

Kum 1988-a din Danish band lar Michael Learns To Rock (MLTR) te hi Meghalaya sawrkar buatsaih 'Me’gong Festival' ah an inlan dawn bawk a, a hun tur tak erawh hriat theih a la ni lo. MLTR hi October 2005 khan Jawaharlal Nehru Sports Complex, Megahalaya-ah an lo inlan tawh a, mipuiin an ngaihhlut em avangin state sawrkar chuan a chah chhuak leh dawn ta a ni - a vawi hnih nan Meghalay-ah concert an nei leh dawn e.