Patling sek phiar fuat ten  theih tawp a hmai an han inhneksak chawrh mai hi chu han ngaihtuah mai pawh hian thil na tak tur chu a ni reng mai. Mahse, MMA professional fighter te chu an infiamna mualah inhnek hi a tel miau bawk si. Chuvangin, an tan chuan hnek tawrh huai leh hnek nat hi a pawimawh em em a ni. MMA fighter zingah tunge hnek na ber ang tih hi zawhna zawh zin pawl tak a ni a, tah hian a chhanna chu kan han dah dawn a ni.

Fighter tam zawk te hnek nat zawng hi teh na mumal tak a tehna neih a ni chiah lova, chutihrualin MMA fighter tha ber ber te hi khawvel a hnek na ber ber an ni lo tih chu an kutthlak atangin kan hre tlang tho awm e. Fighter then khatin an khingpui te an hnek tluk dan atang leh  an hnek sawprawp dan atangin MMA fighter hnekna 10 thlan chhuah a ni a, chung thlan chhuah te chu i pawm zawng an ni em han thlir ve chhin teh.

Number 10 Derek Lewis
    Derek Lewis-a’n a khingpui te a hnek hi chu a na tih a hriat ngawih ngawih thin. He mihring hi chuan a glove chhungah hian lung a dah emaw tih mai tur a ni. American professional mixed martial artist Lewis hi heavyweight huanga khel lai mek niin 2010 atang khan Lewis hian MMA bul tanin Bellator MMA leh Legacy FC te pawh luhchilh tawhin heavyweight champion a ni tawh thin. 2021-ah hian UFC heavyweight ranking-ah pahnihna niin Lewis hian fighter 25 zet alo tuk zal tawh a, chung zinga fighter 20 te chu knockout hmanga a hneh te an ni. 

Number 9 Justin Gaethje
    Gaethje hi fighter zinga hnekna ber pakhat a ni a, he pa hian a ban tha hruiah nuclear power zungzam a nei tiin an sawi hial thin. Chiang taka a hnek fuh tawh tho zui tur an awm ngai lo. 

Gaethje hi one-punch KO nei tia sawi thin a ni a, James Vick leh Edson Barboza te pahnih a hnek thlu phei chu an thal chiang hle a, a hnek nat hle rualin chiang taka hnek tluk a KO aiin TKO hmanga hneh hi  a ngah zawk a, chutiang chuan May thla khan Tony Ferguson pawh a hneh a nih kha.

Number 8 Jan Blachowicz
    Poland mi Jan Blachowicz hian Dominick Reyes chu TKO hmanga hnehin UFC light heavyweight champion a ni a, amah hi fighter ropui Jon Jones a lakah chiah a la tlawm a ni. Eng nge a chak thin chhan tia Blachowicz hi i zawt a nih chuan "Legendary Polish Power," vang a nih thu a hrilh ngei ang che.  

Jan Blachowicz hian a hnek nat zia octagon chhungah a lan tir zauh zauh tawh a, chung zingah chuan Corey Anderson leh Luke Rockhold te pahnih a hmachhawn tuma a hnek khan a kut thlak a nat zia a lan tir chian hle awm e. 

Number 7 Dan Henderson
    UFC middleweight tournament champion leh Pride middleweight champion hlui Dan Henderson a hnek nat em vangin H-Bomb tia koh fiam hial mihring a ni. 

Hendo hi weight division hrang hrang pali-ah khel kualin welterweight atangin heavyweight thleng a khel. Henderson hian thleng sang lutuk lo mah se, a hnek nat zia chu hai rual a ni lo. Weight division hrang hrangah a tel kual tam lutuk chu a hniam chhan pakhatah an ngaih sak a, a kut tum ding lam hi chuan knockout power a nei chiang hle thung.

Welterweight huangah Renzo Gracie te a insualpui zak zak hnuah palian Fedor Emelianenko te nen heavyweight lamah an intum leh ang lawp lawp a. 2011, July  thla khan Henderson hian tuma la hneh ngai loh Fedor chu TKO hmangin a rawn hneh a, hei hi a hmingthan pui hle nghe nghe. Hei bakah hian UFC middleweight champion kawnghren hreng miah lo khan  UFC champion hlui Michael Bisping chu a sawp hrep ang lawi a. Henderson hi tunah chuan a chawl thawh a ni.

Number 6 Jairzinho Rozenstruik
    UFC a luh tir fight pali ngawtah a chak nghal a, chung zingah chuan Alistair Overeem a hnek tluk phei chuan mipui ngaihdan a thlak chianghle nghe nghe. 

Jairzinho Rozenstruik hian Francis Ngannou chu a cho zui a, mahse a aia hnek na zawk hian a hnek thal ve leh thung. Mahse, Jairzinho Rozenstruik hi UFC history a hnek na an sawi chang chuan sawi hmaih a ni tawh ngai lovang. Fight 12 a chak zinga 11 zet chu knockout hmanga a hneh vek an ni.

Number 5 Anderson Silva
    Anderson Silva hi MMA history-a fighter tha ber zing a mi a ni a, Middleweight division-ah kum khat chuang a vawk lal len theih chhan kha, a hnek nat em vang a ni. Silva hian UFC-ah knockout 11 zet a nei a, KO ngah ber pahnihna a ni phak.

Anderson Silva a KO zinga langsar tak pakhat chu UFC 126-a Vitor Belfort-a hmai a a pet thal tawp leh UFC 101-a Forrest Griffin a KO kha a ni awm e.

Number 4 Chuck Liddell
    UFC Hall of Famer Chuck Liddell hi knockout artist ropui zinga chhiar tel chu a ni hauh lo. Mahse, hun eng emaw chen chu Liddell hian UFC Light Heavyweight Champion kawnghren alo hreng ve tawh thin. Mi a hnek tlu tam lo kan tih rual hian hming lang tham mi engemaw zat chu a kut tum hmang hian a lo knock thal tawh a ni. 

Liddell-a knockout zingah hian Kevin Randleman, Guy Mezger, Renato Sobral, Alistair Overeem, Tito Ortiz, Randy Couture, Jeremy Horn, leh Wanderlei Silva te an tel. 

Number 3 Wanderlei Silva
    A hnek nat hmingthan puitu hian Pride fighting championship lamah hming a chher hle a, The Axe Murderer Wanderlei Silva hi sport khawvel-a hnek na ber pakhat a ni. 

A hnekna tih chu a khingpui tena an hnek tawrh har an tih dan atang hian a hriat awm e. Silva hi middleweight huanga khelh thin a ni a, hei bakah hian heavyweight lamah pawh inlan ve zak zak thin.  

Heavyweight lama Mike Tyson an bul a tan that leh dawna a coach Chute Boxe Rafael Cordeiro chu coach-ah a la a, hnekna tura zirtirtu tur thlan kawngah hian a tisual hran lo. Tunah chuan UFC fighter zinga hnek na ber pawl a sawi a ni ta hial a ni. 

Number 2 Vitor Belfort
    Vitor Belfort hian fighter 18 a hmachhawn tawh zinga 12 zet chu  knocked out hmangin a lo tlawm tawh a, UFC fighter zinga knockout ngah ber a ni nghe nghe. Pahnihna chu mi 11 KO tu Anderson Silva a ni.

Belfort hian fighter hmingthang tak tak a hnek tlu nual tawh a, chung zingah chuan Dan Henderson, Michael Bisping, Luke Rockhold, Wanderlei Silva, Rich Franklin, Matt Lindland leh Tank Abbott te an tel.

Number 1 Francis Ngannou

France khawpui Paris-a vakvai rihna tur mumal pawh nei lo kha tunah chuan UFC heavyweight fighter ropui ber zinga chhiar tel a ni tawh. UFC a luh tir, hlawh tlinna a la sual chhuah tak tak hma atang khan Ngannou hi MMA fighter zingah a hnek na ber pawl a ni tih an hre nghal. 

UFC a luh tir hian a kingpui paruk zinga panga chu KO hmangin a hneh nghal a, chu chuan a hnek nat zia a pholang chiang hle awm e. 

Dana White-a chuan, “Francis Ngannou hi khawvel mihring zinga hnek na ber record a chelh mektu a ni, a hnek nat zawng hi horsepower 96 nen a intluk tawk vel a, chu chu Ford Escort top speed nen a chak lam a inang vel. Tin, lu chung lam atang a tuboh lian hmanga chhip thlak chawrh nen a intluk thuak bawk,” a ti.