ZALEN, Jan. 13, 2025: Dhar, Madhya Pradesh-a January 8 atanga tan, Pathiannia zawk tak Mixed Martial Arts (MMA) National Amateur Championship-ah Mizoram aiawha kalten medal pahnih an la.

Mizoram State MMA Association (MISMA) hian he inelnaah hian fighter pathum a tir a. Lalnunsanga, Chawnpui-in featherweight-ah gold medal lain Benjamin R. Lalremmawia, Ramthar North/ Ngopa-in flyweight-ah bronze a la bawk.

An zinga medal la ve lo, Lalramsangliana, Bawngkawn South pawh che chhe chuang lovin bantamweight-ah quarter final a thleng pha tho a ni.

Nunsanga hi nikumah pawh gold a lo la tawh a, champion lai a nih avangin round of 16 a awl (bye)-in quarter final atangin a inlan tan a. Champion hlui, Tamil Nadu mi chu submission (Rear Naked Choke)-in a hneh nghal a, semifinal-ah Assam fighter technical knockout-in a hneh leh a. Final-ah a thlengtu state fighter chu submission (Armbar)-in a hneh leh bawk. 

MISMA President Rinpuia chuan inelna hi kumtir a nih avangin fighter an thawn tam thei loh thu a sawi a. Kuminah hian state level championship vawi hnih bakah fight night lian tak (MFL) huaihawt an tum thu a sawi. 

Technical Chairman Samuel Lalrozama pawhin professional line kal theihna kawng tha tak mai an zawm mek, MMA India National Federation-in a duan thu a sawi a. BRAVE FC leh UFC nen inkungkaihna tha tak an neih bakah kumin atangin Asian Youth Games leh Asian Indoor & Martial Arts Games-ah telh a nih tawh tur thu Olympic Council of Asia-in a puang tih a sawi.