Aizawl March 25, 2023: Congress Party chuan LMC Inthlan tur campaign-in vawiin khan Lunglei hmun hrang hrangah hun an hmang a, heng huna thusawitu MPCC President Lalsawta chuan, MNF an tang em em a, an tan zia lantirtu chu an President leh Chief Minister ni mek Lunglei-ah kal lovin Aizawl-ah an khung bet thei hi a ni, a ti.

Lalsawta chuan huaisen leh dawihzep chungchang sawiin, "Pu Lalduhoma a MLA nihna an paihsak khan a MLA pui te'n an hotupa thlavang hauh ngam lovin a mimalin an tawrhtir a. Khang MLA te kha huaisen ngam se chuan he sawrkar hi an sawi nghing dawn tih ka hria. Chutiangin MNF MLA te anmahni thlangtu mipuite thihna kotlanga an din laiin Pu Zodintluanga'n RT-PCR a pek pawh an dawng ngam lo a, thihna leh natna an mipui te'n an tawh laia huaisen ngam lo Lunglei MLA te ka dem a ni. Mi dawihzep tan hruaitu ropui leh rintlak a nih theih loh. Mizoram hmun tam takah 'That Loh Theih Lohna Bawm' an din thei. That Loh Theih Lohna Bawm hmangin Congress party in Mizoram hi sawrkar tha, mi taima leh mi thawkrim te dinchhuahna ni turin kan siam dawn a ni," a ti. LMC inthlanah MNF an tang em em a, an tan zia lantirtu chu an President leh Chief Minister ni mek pawh Lungleiah kal lovin Aizawlah an khung bet thei a ni, a ti bawk.  

Vantlang Inkhawm a buatsaiha hun a hmanah MPCC President Lalsawta chuan, LMC inthlan dawn vangin Lungleia chhungkaw tam tak chu Ni 100 inhlawhna a bo tawh dawn avangin an lungngai, mahse lungngai lo turin kan duh. Congress party in sorkarna kan chang a nih chuan chhungkaw khawsak harsate chhawmdawlna tur Urban Employment Guarantee Scheme kan kalpui dawn a ni, a ti. 

Lalsawta chuan, "Vawiina kan ram buaina ber chu ram hruaitu te'n hausak an duh em avang a ni a. Chung chuan ram himna a ti derthawng a ni. Pathian leh Mizoram mipui te'n Congress party sawrkarna min a nih chuan ram hrisel leh ram him, chenna nuam Mizoram mipuite kan pe dawn. Chumi atan chuan tun LMC inthlanah Lunglei mipui te'n bul an tan a ngai a ni," a ti.