ZALEN October 30, 2023 : Prof. F. Lalnunmawia, MNF Gen. Hqrs. Adviser chuan Pathian leh mipui duhsakna hmanga Sawrkarna an chan leh ngei a rinthu a sawi a, MLA Election Manifesto 2023-a an tarlan pawimawh tak chu Youth Oriented SEDP a nih thu a sawi.

Vawiina thuthar lakhawmtute a kawmnaah Prof. F. Lalnumawia chuan Zoram thalaite eizawnna leh hna thawh bul tanpuina tur, Youth Oriented SEDP in a tum ber chu zoram thalai eizawnna nghey nei lo te tana eizawnna kawng kawhhmuh leh chumi atana an bul tanna tur sum ngaihtuahsak a ni, a ti. Mizoram chhung leh pawn lama hna thawk leh hna zawng turte tan Entrepreneutship Development Programme kalpui a ni ang, a ti bawk.

Mizote chu theihna leh thiamna sang tak nei an ni a ti a, heng finna leh theihna te hi eizawnna atana hman tangkai tir an tum tih a sawi a, SEDP hmangin Skills Development lam uar a ni ang, a ti.

Planning Dept., LESDE leh Mizoram Youth Commission (MYC) te hmang tangkaiin mumal taka kalphung tur siamin Youth Oriented SEDP hi kalpui a ni ang a, hemi atana hian budget-ah fund tam zawk dah a ni ang, a ti.

Youth Oriented SEDP atan hian eizawnna hrang hrang-a tuimi te puih an ni ang a ti a. Infiamna lama tuimite pawh sponsor an nih tur thu a sawi lang a, Paramedical leh Nursing lama hlawhtling te, India ram damdawiin lian - AIMS, Apollo leh Foreign-a nurse thawk duhte chu SEDP hmanga sponsor an nih tur thu a sawi bawk.