Aizawl : Congress party chuan nimin khan AMC inthlan lo awm turah thuthar thehdarhtute an hmachhawn a, he hunah hian Congress Legislature Party Leader Zodintluanga chuan, “Chak ngei tumin Congress party chuan nasa takin tan kan la a. Kan campaign danah mipui mit tikham zawng emaw, mipui tana ninawm tak emawa kan lo che palh a nih chuan ngaihdam kan dil a ni,” a ti a, MNF party chu sawrkar tlak lovah puhin tling zo lo tur ZPM vote lovin mipuite chu Congress vote turin a sawm.

CLP Leader chuan, “AMC Inthlan lo awm tur boruak thlirin ZPM hian khawi ward-ah mah tlinna chance an nei tak tak lo a. Tling tak tak chuang lo tur ZPM candidate vote hian AMC sum nasa taka ti chingpentu MNF tlinna chance a siam mai mai dawn a ni. Chuvangin, Aizawl khawpui hmasawnna tura ruahmanna tha tak neitu, Congress Party Candidate-te lo vote vek turin Aizawl mipui kan ngen a ni,” a ti.

Municipal Corporation inrelbawlna chung-chang a sawinaah Zodintluanga chuan, “AMC hi India Danpui-in thuneih na sang tak a pe a, State sorkarin a duh duhin a khawih danglam thei lo va. Kan sorkar lai pawhin sum tam tak sorkar laipui atangin an dawng thin a. Budget hranpa nei a, Central Finance Commission atanga khawpui enkawlna tur sum dawng thin a ni zawk tih kan hriat a ngai. Mipuiten duh taka kan thlan tlin chu state sorkar hian tha takin a thawhpui mai tur a ni,” a ti. AMC pawisa a hun taka an pek thin loh avangin an sawrkar lai pawhin sum tam tak an chawi thin thu a sawi lang tel bawk.

Congress sawrkar laia bawlhhlawh bawm sem chungchang press mite zawhna a chhanah Zodintluanga chuan, “Asian Development Bank a mi thiam ten kan bawlhhlawh neih dan mila thil an chhut behchhanin bawlhhlawh bawm kha pek kan ni a, min petu lam khan kan Mizo bawlhhlawh paih dan kha an hrethiam lo a, keini lam pawhin tui lo tak chungin kan dawng a ni,” a ti.

CAA chungchang sawi kaiin CLP Leader chuan, “Citizenship Amendment Act (CAA) barh luih kan lo ni tawh a. Tunah hian Scheduled Tribe-ten hnam tenau kan nih anga hamthatna kan dawn thinte min chuhpuiin, Mizorama Hindu awmte minority a dah a, an puala reservation siamna tur ruahmanna kalpui a lo ni leh ta a. CAB pawh thlawp duhtu MNF sorkar hian a thlawp leh mai ang tih a hlauhawm, MNF-in Central lama BJP an thlawp chhung chu Mizo hnam tan a him lo a ni tih hria a MNF kan hnawl rih hi a ngai takzet a ni,” tiin, BJP National Spokesperson, M.Kikon-a’n, ‘MNF hi BJP vanga tling an ni’ tih a sawi pawh tun thlengin MNF hotuten a nih loh thu an la sawi ngam lo a niin a sawi.

Ailawng leh Neihbawi (Sihphir) a AMC ram lei chungchanga cheng nuai tam tak eirukna Congress Party in an haihchhuah hnuah pawh rorellai MNF Party chuan sawifiah ngaihna a hre lovin, ngawihbopui a tum, niin a sawi a. Ailawng ram neitu an sawifiah tirna leh Assembly leh RTI zawhna chhanna a inmil thei lova, ‘eng vanga ram dahkham (mortgage) sa lei nge’ an ni tih chu an sawifiah zo lo a niin a sawi.