March 24, 2023, North Vanlaiphai Joint Action Committee (JAC) chuan Mizoram sawrkarin an khuaa awm mek Block Agriculture Office hmun danga a sawn chhuah duh lohna chungchangah hmalakna an kalpui chhunzawm zel a. March 28, 2023 (Thawhlehni) ah an khawtlanga Rulling Party Unit zawng zawng leh group hruaituten an party a an nihna bansanin, an seal te Hnam Run (Aizawl) ah dah ang.

North Vanlaiphai JAC in mipuite hnena ngenna leh hriattirna thuchhuah an siama tarlan a nih danin, N. Vanlaiphai khuaa rulling party atanga VC member thlan tlinte pawhin MNF party VC an nihna thiatin Independent VC din an duh thu District LAD officer, Serchhip ah an thehlut tawh bawk a, DLAO, Serchhip thu ngaihchan mek a ni,

MNF Unit/group hruaitute leh VC te inhuamna an thlawp zia leh an hriatpui ziah tihlanna atan March ni 28, 2023 (ThawhlehniO ah N. Vanlaiphai khawchhung ah total bandh neih an tum bawk a, khaw dang atanga N. Vanlaiphai kal tumte leh kaltlang ngaite pawh kal lo turin an ngen a, bandh hi zing dar 6 atanga tlai dar 5 thleng tura duan niin, a tul a nih chuan a laklawhah pawh tihtawp theih a ni ang.