ZALEN November 1, 2023 : Aizawl North II ZPM Official Candidate Dr. Vanlalthlana chuan, "Chief Minister Pu Zoramthanga'n June, 2019-a Budget Session neih a nih khan MNF Sawrkar Flagship Programme a Rua chin a nih thu a sawi a. Sum tam tak sen a nih hnuah, a hlawhchham tak em avangin, kar leh maia inthlanna kan neih turah MNF campaigner tumahin sawi chhuah pawh an ngam tawh lo," a ti.

Dr. Vanlalthlana chuan, "An Flagship Programme - Raw Chin hi a hlawhtlinna engmah sawi tur an neih loh avangin hemi lama zawhna chhan pawh harsa an ti hle. June 2019 a Assembly Session neihah khan Pu Zoramthanga chuan mau hmanga hma an lak dan turah khaw hrang hranga mipuite intelkhawma Society anga kalpui tum a ni a ti a. A tlem thei ang bera chhut pawhin thingtlang In 100 khua vel chuan Rua hi kum khatah nuai 3 vel an thar thei dawn a, hemi sawngbawl tur hian an khaw hmunah Industry din nghal zel a ni ang a, hei hi thalaite tan hnathawh tur siamtu tha tak a ni nghal dawn a ni abawk a nih kha," a ti.

Aizawl North II ZPM candidate chuan, "Hmanni lawka Horticulture Department in Family Oriented SEDP dawngtute hlawhtlinna tarlanna lehkhabu ‘SEDP Lawmna Thangkhawk’ an tihchhuahah khan dragon fruit, lakhuihthei, khanghu, adt tar lan a nih hnuah, a tawp berah Khawzawl lama Rua chingtu hlawhtling tar lan a ni a. Rua ching hlawhtling pakhat chauh tarlan a nih laiin chik taka en chuan Rua chingtu hian kum 2013 daih tawh khan Rua a lo ching tawh a ni," a ti.

Zawhna zawtin Dr. Vanlalthlana chuan, "Heti a nih chuan SEDP hnuaiah hian Rua chingtu tumah an la hlawhtling lo va. Kum khata a nu chen theia sawi Raw tha mi kha an ching ta lo nge, sawrkarin Raw chi supply tute sum siam nan an Flagship Programme an hmang ta zawk tih hi mipuite zawhna lian ber a ni. Kum 5 chhunga mahni Flagship Programme ber hlawhtlinna sawi tur nei lo hian eng chhuan lam nge an neih," tiin, Kan CM sawi anga IAS hovin ban an duh hialna tur khawpa ruahmanna felfai an neih loh zia a tilang chiang hle a ni, a ti bawk.