ZALEN April 8, 2026 : MNF Corporator hlui te chuan vawiin khan thuthar lakhawmtute an kawm a, AMC Sports Complex, Bawngkawn chungchangah ZPM chuan thudik lo an thehdarh niin an sawi a, enho an cho thu leh thudik lo hmanga mipui bum ching tawh lo se an duh thu an sawi.

Coporator hlui te chuan ZPM party in thu dik lo hmanga AMC an beihna thenkhat hi sawifiah ve a ngai a. AMC Sports Complex, Bawngkawn ami hi Local Council leh NGO te remtihna-a PPP Mode a Agreement siam a ni a, AMC in Fund a hmuh ang zela hna hi thawh tur a ni. A hman man atangin AMC in 60% leh Bawngkawn khawtlang in 40% chang tur a inrem a ni a, a enkawlna senso erawh chu AMC tum tur a ni. Management Committee hi Bawngkawn Local Council hnuaiah din a ni a, AMC Represent mi 2 an tel ve chauh a ni, an ti.

Social Media lama thlalak tarlan chu AMC in a lak hma ami a ni a. YouTuber hire-a Bawngkawn West Local Council hruaituten an rawn tih lan lehah pawh hian DPR leh Detailed Estimate sawi chiang duh lovin an rinthu nen mipuite rilru hruaikawi tumin an rawn sawi leh mai a ni an ti a,

MNF Corporator hlui te chuan, "Hna te hi kum tamtak chhungin Fund tlachawp awm dan a zira thawh an nih avangin lo lang hlui deuhte awmin Fencing Post te leh Fencing Net te a lo bo nual tawh a. A thar hlima Engineer ten an approve ang ni thei tawh lo thil thenkhat a awm a ni. Hna thawh danah hian eirukna leh dik lo taka thawh a awm lo a ni tih hi finfiah kan ngam a, Sawrkar hian chhui chiangin Bawngkawn khawtlang leh AMC te nen Contractor te kovin enho vek kan cho a, kan duh bawk a ni.

"Bawngkawn West Local Council, kum 2025 a din, hruaitu tharte hian an area-a Sports Complex awm hi anmahni bila enkawl an an tum vangin hetiang boruak hi an siam ta em ni tih hi zawhna lian tak a ni a. Ruling party in remchang lo laa campaign auhla bera an hmang zui ta phei hi chu a zahthlak a, tualchhung Politics tha lo tak khelhna atana hmang tawh lo turin kan ngen a. Inthlana tlin duh luat avanga thudik tawklo hmanga mipui bum tum hi ching tawhlo se kan duh takzet a ni," an ti.