Aizawl June 19, 2024 : School Education Minister Dr. Vanlalthlana chuan Sörkar hmasain school 340 lai 'upgradation' a lo kalpui tawh chu dan siam hmasakah thil fel tawk lo a awm avangin Council of Ministers meeting thutlukna hmasa zawk thiatin enthat leh turin a ti a ni, a ti a, school thenkhat chu upgrade theih a ni dawn loh thu a sawi bawk.

ZPM party sawrkarna a chan tirh atang khan he thil hi ngaihven zui nghal niin school 340 te dinhmun chawisanna tur pawh 2024-2025 State Annual Budget-ah pawh dah nghal a ni a ti a, school 180 te provincialiazation pawh DP&AR lamah thawn nghal a ni. Amaherawhchu, upgration hi kalpui tak tak dawn chuan School Education Department leh Mizoram sawrkarin dan (Act&Rules) a neihsate hman theih lo khawpa sawrkar hmasa Council of Ministers meeting in a lo siam avangin ngaihtuah that tur chhawp chhuah leh a ngaih phah a ni, a ti.

School Education Minister chuan, "Rules siam ngai leh notification siam ngaite buaipui nghal char char a niin rules thar pahnih (2) chu DP&AR leh Legal Department phalna kan la vek tawh a. Rules awm sa atanga ngaihnathiamna kan pek dan tur chin ngaihtuah mek a ni. School upgrade phu tak takte chu upgradation kalpui chhunzawm a nih dawn lalin danin a phut anga building pawh nei lo, result nei chhe lutuk-te leh naupang neih tlem lutukna te chu upgrade theih a ni dawn lo a, school zirtirtute leh a enkawltute chu tang lehzual sauh turin ngen an ni," a ti.

Dr. Vanlalthlana chuan, "Inthlan dawna, hnawhsaruma thil tih a nih avangin heng harsatnate hi kan tawk ta ni tih hi min hriatthiam pui turin Zoram mipuite kan ngen tak meuh a ni. Zirtirtu, chhungkua leh khawtlang thahnem tak an hrilhhai ngei ang tih pawh kan ring. Hetiang ang thutluna siam hi thil awlai lo tak a ni tih min hriat sak tura kan ngen rualin an tan kan bei zel a min hriat sak turin kan ngen leh a. Tunah hi chuan fim takin, dan kan neih sa en chung a upgrade phu, school ten duhsak an hlawh theih nan hma lak a ni chho ang," a ti bawk.