Aizawl August 1, 2024 : Nilaini khan Mizo Hnam Run-ah MNF General Headquarters, Elected Office Bearer-te leh Aizawl khawpui chhunga MNF Local Council member ten joint meeting an nei. Aizawl khawpuia Local Council 85-ah MNF Local Council-in Veng 73-ah rorelna an chang tih report a ni.

He joint meeting kaihruaitu Sr.Vice President Dr. R. Lalthangliana chuan Local Council member-te nena inhmuhkhawm rawt a nih chhan sawiin kumthar lama Local Council inthlan lo awm tur atan tun atanga inbuatsaih lawk a tul thu a sawi.

MNF Treasurer Lalruatkima chuan, "MNF hi party a ni satliah lova, hnam thuthlung kengtu kan nih avangin MNF Local Council Member-te chu kan chungah mipui mit a fu bik a. Hna kan thawhna reng rengah tha takin kan ti zel tur a ni a. Mahni veng chhungah min mamawhtute chu kan hawisan tur a ni lo," a ti.

   Joint meeting-ah hian Aizawl City Local Councils Association (ACLCA) hruaitute hnen atangin hmalak tawhnate leh tuna MNF-in Local Council-a rorelna an channa te leh party dangin Local Council-a rorelna an channa te ngaihthlak a ni a, tun dinhmuna ACLCA hnuaia Local Council dinhmun hriat theih chin report a ni bawk.

Aizawl Khawpuia Local Council zat - 85

MNF LC - 73

ZPM LC - 6

Cong LC - 6

He meeting-ah hian rawtna leh thurawn te bakah, MNF party hmasawn zelna tur leh insawhnghehna tur te sawiho a ni bawk.