Aizawl March 31, 2023 ; BJP Mizoram President Vanlalhmuaka chuan MNF chu an insawi thei duh anih chuan an intiam pathum, SEDP Cheng Nuaithum (3) chhungtin an sem hunah te, Kawngchhawng an siam hnuah te, Mizoram thar chhuah ngei Buhfai kan ei hunah te duh leh insawi thei rawh se, a ti.

BJP Mizoram Friday Political Session-ah Vanlalhmuaka chuan, "Tunlai hian AR insawn chhuah leh chhuah loh a inhnialna a tam hle mai a, AR sawn chhuak thei tu tak tak chu BJP te kan ni tih hi Mizoram mipui te hriat ah ka sawi duh a ni. Sawrkar lai MNF ten Assam Rifles insawn chhuah chungchanga inti thei taka an tlangau na hi anmahni tih a ni lo tih hrechiangtu chu MNF unau te hi an ni," a ti.

Hmuaka chuan, "Mizorama sawrkar mek Zoramthanga kaihhruai MNF hian an tuhloh rah seng tum tawh lo se, Mizoram mipui hmaa insawi theih an duh a nih chuan mipui hmaa an intiam pathum, SEDP Cheng Nuaithum (3) chhungtina te, Kawngchhawng an siam hnuah te, Mizoram thar chhuah ngei Buhfai kan ei hunah te duh leh insawi thei rawh se. A chhanchu heng thil pathum lek pawh Inthlan dawna mipui hmaa an intiamna pawh an tihhlawhtlin theih loh vang a ni. Chuvangin keini BJP chuan Mipui hmaa kan intiam angin kan ti thin a, kan tuh loh rah seng kan tum ve lo a ni," a ti.

Hmuaka chuan, "Union Home Minister Amit Shah lo kal turin, Mizoram tana hmasawnna hna thawh tur a rawn hawn tur zawng zawng hi avaiin Crore 2414.027 chuang man a ni tih Mizo mipui te hriat ah kan puang duh, MNF sawrkar in Union Minister rawn zin chhana an sawi AR hmun thar Construction tur leh Laldenga Hall Crore 300 bawr vel ringawt chu Mizo mipui te kan hrilh duh chauh mai a ni. BJP Union Home Minister Amit Shah hian Mizoram tana tangkai tak tak tur a rawn hawng tur hi kan lawm a, hei aia nasa zawk pawh hi BJP Mizoram chuan central ah kan thlen zel dawn a ni," a ti.