October 31, 2023; ZPM chuan tun tum inthlan a an elpui ber, MNF party chu mahni thutiam a ding nghet lo, veng khat pa daw thei leh rinawm lo an sawi ang mai an ni tih an tarlang.

Vawiin Aizawl Press Club a thuthar thehdarhtute an kawmna ah he thu hi sawiin, an GS Eddy Zosangliana Colney chuan, tun tum inthlana an elpui ber chu rorel lai MNF party an ni tih sawiin, party dang an lang phak lo niin a sawi.

"Mizo ten mi rinawm kan tehna pakhat chu thutiama dingnghet te hi an ni thin a, chuti zawnga kan teh dawn chuan kan sawrkar thlahliam mek hi mahni thutiama ding nghet lo, veng khat pa daw thei leh rinawm lo an sawi ang mai an ni," a ti bawk.

ZPMC GS chuan MNF party chu an intiamna tam tak tihhlawhtlin an nei lo tih sawi bawkin, chung mite chu an khingpui tur an nih thu leh Mizoram mipui hian tute nge an nih an hriatchian tawh thu te a sawi.