ZALEN October 5, 2023 : Congress Legislature Party Leader Zodintluanga chuan Mizoram-ah drug a hluar hle a, tichung chuan he harsatna chinfel a nih theih nan MNF sawrkar chuan fund a dah tam lo va, ruahmanna tha pawh a nei lo a ti a. Drugs addict thi an tam chhanah mawhphurtu-ah a puh bawk.

Zodintluanga chuan Kum 2018 inthlan dawn khan MNF te hian drug rehabilitation lamah hmalakna an kalpui ang an ti a. Tunah an hun a tawp tep tawh a, drug lama harsatna chingfel turin hmalakna liantham an nei lo. MNF rorelna hnuaiah drug supply tihtawp aiin a pung zawk a. Substance abuse pawh thalaiah a nasa zual zawk bawk a. Nunna chan pawh an tam tial tial a ti.

Damdawi hman khawloh avangin Kum 2019-ah Mizo thalai mi 55 in nunna an chan a, kum 2020 ah mi 67 in an chan a, kum 2021 ah mi 47 in nunna an chan a, kum 2022 ah mi 43 in nunna an chan bawk a. Kum 2023 ah hian September thla thlengin mi 47 in nunna an chan phah tawh, a ti bawk.

Zodintluanga chuan, "MNF tena drug smuggling an thunun theihloh avang hian tun hnai MNF kum nga chhung sawrkar laiin thalai nunna chan 259 an awm phah tawh a. Heng thalaite nunna chanah hian tu nge mawhphur? Thalai te drug addict an nihnaah tu nge mawhphur?," tiin zawhna a zawt bawk.

CLP Leader chuan, "State-a MNF sawrkar leh Centre-a BJP sawrkar te hian drugs tawlhruk an thunun thei thlawt lo va, a pung zual zel zawk bawk. Kum 2022 bik khan heroin 152 kg lawih man a ni a, kum 2023 thla kua chhungin heroin 150 kg man a ni der tawh. Mizoram thalaite tihchhiatnaah hian tu nge hlawkna tel? Tute nge drug sumdawnna hi kalpui tu te? Eng vangin nge MNF sawrkar hian a hriatfiaha aman theih hauh loh? A remtihna hnuaia kal zawk em ni? a ti zui bawk.

Drug supply tamna chhan hi pahnih chauh a awm thei tiin, "MNF sawrkarin a thunun thei thlawt lo ; chutiang a nih chuan sawrkar zui zel tlak a ni lo, tih leh drug cartel ah hian telin thalaite tihchhiat pawisa lovin sum siam nan an hmang em ni tih a ni. INC tena thuneihna kan chan chuan chhui chian vek a ni ang a, mawhphurtute hrem lohin an chhuak lovang," a ti.