Aizawl: Nimin Remna Ni kha MNF Party hruaitute chuan hmun hrang hrangah an hmanpui. MNF Senior Vice President Tawnluia chuan Thenzawla Vantawng Group YMA Hall-ah Remna Ni hi hmanpuiin, ramin zalenna a sual lai support-tu leh Zoram mipuite remna a awm theih nana theihtawpa ke pentute hnenah lawmthu sawiin chibai a buk a, “Vawiinah hian kan Hnam Pa Pu Laldenga kan hre reng a, Zoram zalenna atana sulsutu, chutiang bawka remna atana thawhhlawk ber ni bawk hian chawimawi a phu tak zet a ni,” a ti. MNF Vice President R.Tlanghmingthanga pawhin Saitual Auditorium-a MZP Hqrs. Saitual-ten an hmanna hun chu a hmanpui a, thu sawiin, “MNF-in zalenna a sual chhan kha hnam dangte awpbeha awm reng turin Mizote hi Pathianin min din lo va, mahni kea ding chhuak tura kan beih hi a duh dan pawh a ni. Pathian leh kan ram tan tiin kan hnam zalenna turin hnam sipaite an thi a, kan hnam tana remna an sual chhuah hi thangtharte hian inpekna nasa tak nen zuiin, kan silai mu kawl bullet ni tawh lovin, ballot paper hmangin i chhunzawm ang u,” a ti. MNF Treasurer Vanlalzawma pawhin Lungleia Art & Culture Archive Hall-ah Remna Ni hi hmanpuiin, “Remna Ni hmangtu tur ber chu Mizo mipuite hi kan ni a, Mizo nula leh tlangval, ram leh hnam tana kal chhuakte kha remna kan neihna tura pen chhuak mai an ni lo va, Mizoram leh hnamin zalenna tluantling kan neih theihna tura pen chhuak an ni,” a ti bawk.