ZALEN April 12, 2026: MNF party chuan Aizawl Municipal Corporation inthlanah sawrkarna an chang anih chuan mumal zawka inawpna Aizawlin a neih theih nan Aizawl khawpuia cheng dik takte chhinchhiahna (Population Registration) uluk zawka kalpuiin nau piang, mitthi leh pem lutte chhinchhiah an tum tih an sawi.

Nimin khan Aizawl Press Club-ah chanchinbumite kawmin MNF AMC candidate R.Lalnunthari (Nunui Rualhleng) chuan Aizawl hmasawn zawk, changkang zawk leh mipui mimir hrim hrim pawh dinhmun sang zawka hlankai tumin an inruahman tih a sawi a. An hmachhawp sawiin AMC inrelbawlna tha zawk leh chak zawk siam a, Local Council leh Ward Committee-te mawhphurhna a lo mumal zawk theih nan ruahmanna siam te, AMC chak leh langtlanga hna thawh tur din chhunzawm leh thawktu lak belh an tum.

AMC Licensing Regulation 2012 ennawn a, ram leh hnam himna tur leh Mizo sumdawngte tana hamthatna turin AMC Licensing Regulation ennawn te, Aizawl khawpui veng hrang hrangte leimin leh lei tlahniam laka a him zawk nan tuihawk luankawr tha zawk leh a khuhna siam belh zel te, Aizawl khawpui a lo ralmuan leh zual a, rukru leh misual laka mipuite an him nan leh hnu chhui awlsam zawk nan Local Council area hrang hrangah CCTV a tam thei ang dah belh an tum a.

Aizawl khawpui faina leh mawina (beautification) lam hawia hmalakna kal mek chhunzawm zel a, Aizawl khawpui kawtchhuahah Aizawl gate mawi taka siam te, Aizawl khawpui bawlhhlawh paih leh sawngbawl lamah tan lain bawlhhlawh tihral dan mumal leh tha zawka kalpui tum a nih thu te, Aizawl khawpui 'Plastic Free City' a puan tawh chu a hlawhtlin zel theih nan chak leh felfai zawka hmalak chhunzawm a nih tur thu an sawi.

Bawlhhlawh (Solid Waste) paihna hmun siam belh tura hmalak te, ran vulh leh ran khuahkhirh chungchangah Local Council-te be rawnin mipui zawh tawka hmalak chhunzawm zel te, mipui kan lo hrisel zawk nan Aizawl khawpuiah sa leh thlai thianghlim chauh zawrh a nih theih nan hmalak zel te, mipuiten awlsam zawka chawhmeh an lei theih nan veng chhung bazar tam zawk siam bakah septic tank khat tawh tih fai leh ek paihna hmun siam belh te chu an tum langsar zual niin a sawi.

He hunah hian Ward No II candidate Lalnunpuii leh Ward No XII candidate C. Vanlalchanchinmawii te pawh he press conference-ah hian an tel a ni.