Aizawl March 24, 2023 : MNF chuan thuchhuah siamin Mizo mipuiten beiseina nena an thlir, Aizawl Khawpui atanga Assam Rifle insawnchhuah chu a takin a lo thleng dawn an ti a, Mizoram sawrkar Zoramthanga kaihhruai hnathawh chu ropui tiin an chhuang takzet thu an tarlang a. Chief Minister hian mutmawh hnarmawhah a nei tiin a tumruhna leh thahnemngaihna Mizo mipui tan chhuanawm an ti.

MNF thuchhuak chuan, "Thenkhatten ringlo a, deuhsawhna chitin reng nena beih a nih lai pawhin, Chief Minister Pu Zoramthanga hian a tum a thulh chuang lova, chawl lovin a hmalakna kalpui zelin central lama thuneitute a dawr reng a, vawiina ahlawhtlinna ruangam lo lang ta hi, Aizawl khawpui leh Mizoram tan mellung pawimawh tak a ni reng dawn a ni," a ti.

MNF thuchhuak chuan AR in an hmun an chhuahsan tur chungchangah mipui tan leh ram tana hman angkai turin Mizoram Sawrkar Zoramthanga kaihhruai chuan ngaihtuahna a lo seng lawk tah an ti a, mimal tana neih theih loh turin thu Assembly House ah kum 2002 khan, The Mizoram (Restriction) on use of Transfered (Land) Act, 2002 chu a pass tawh a, Notification pawh 20th November, 2005 khan a chhuah tawh. Siamthat ngai, thuawihlote hremna dan turah hmanni maia Budget Session neih zawh takah khan, The Mizoram (Restriction) on use of Transfered (Land) Amendment Act, 2023 a lo pass fel tawh zawk an ti. MNF chuan, "Mipui punkhawmna lian tham awm theihna turin 'Mizo Hnam Pa, Pu Laldenga' hriatreng nan 'Laldenga Convention Center' ropui tak din a ni dawn a ni. April ni 1 hian Union Home Minister, Amit Shah pawhin a lung phum a rawn phum dawn a ni," an ti.

"Mipuite hamthatna tura kan sawrkarin huai taka ke an pen hi MNF chuan thlamuan thlak kan ti takzet a. Political Party dangte hmalakna ni lovin, Pu Laldenga hunlai atang tawhin AR te hi eviction order pek an lo ni tawh a, chumi hnua Pu Zoramthanga kaihhruai MNF sawrkar kum 1998 a rawn sawrkar tan leh khan AR ram luah mek zau tak chu chhuhsakin, Mizoram New Capital Complex(MINECO) hi din a ni ta ni. Khawpui tawt lutuk tur tihzia awm nan sawrkar office hlawm lian te dah nan leh sawrkar hnathawk za tel ten an luah turin Quarter sak a ni tawh bawk. Khaw thar lian tak anga ngaih theih, Mizoram New Capital Complex(MINECO) chu din niin, Mizoram mipuiin kan tangkaipui em em a ni. Hmathlir thui tak nei, kan Chief Minister leh MNF President ni bawk hi Mizoram tan rohlu berte zinga mi a ni," an ti.

MNF thuchhuak chuan, "Khawpui atanga sipai sawnchhuak an awm la hre ngailoten, nasa taka an beihna kara Mipui leh ram tana ngaihtuahna seng tlattu, beidawng ve ngailo Chief Minister kan nei hi lawmawm kan ti a, a hmalakna hi kan thlawp tlat zel dawn. Thenkhatten Tawlailir ring chunga an selna karah beiseina nung nei a, Pathian rinchhan tlat chunga hnathawktu Pu Zoramthanga hi kan fakin kan chhuang takzet a ni," an ti.