Aizawl: Chakma Autonomous District Council inthlan result puan a nih atanga ni 4 hnuah pawh sawrkar tur a la chiang thei lo a. Nimin khan MNF MDC 8 te chuan Larsap hnenah lehkha thehlutin sawrkarna siam tura sawm turin an ngen. Nimin Larsap hnena lehkha thehluttu MNF MDC te hi an hruaitu, Rasik Mohan Chakma chuan hovin Chakma Autonomous District Council inthlan result puan takah MNF chu party mala seat la hnem ber an nih avangin sawrkarna siam tura sawm turin an ngen a, an ngenna lehkha hi Governor private secretary hnenah an thehlut. Press mite zawhna chhangin MNF Legislature party hruaitu Rasik Mohan Chakma chuan, “Sawrkarna min siamtir chuan house-ah kan chak leh chak loh min fiahtir ang a, he fiahna hi kan paltlang ngei kan ring tlat a ni,” a ti. Thudawn danin MNF hian BJP leh INC ticket-a MDC thlan tlin thenkhatte nen sawrkarna hi siam an tum nia hriat a ni. Hetih lai hian BJP pawhin Governor hnenah Chakma Autonomous District Council-ah hian sawrkar an siam theih thu an lo thlen tawh a, Governor thutlukna an nghak mek. Zalen zawhna chhangin BJP Mizoram Pradesh President Dr. JV Hluna chuan, “Sawrkarna siam tur hian ruahmanna kan kalpui zel a, sawrkar thar siam hun tur erawh a la sawi theih loh,” a ti a. BJP kaihhruai Joint Legislature Party-ah chuan Congress bakah MNF pawh an duh chuan an tel thei niin a sawi bawk. Nimin lama khan BJP leh Congress intawm sawrkar thar lalut tur angin thuthang a awm a; mahse, hei hi thu dik lo a ni tih Lawngtlai DC office thawktute chuan Zalen an hrilh. State Election Commission-in ruahmanna a siam dan chuan Chakma Autonomous District Council inthlan kaihhnawih hi ni 28.4.2018 (Inrinni)-ah chuan chinfel vek tawh tur a ni a. Ni 4.5.2018 (Zirtawpni)-ah sawrkar thara session (meeting) hmasa ber neih tur a ni.