Aizawl: Mizo National Youth Front chuan Zirtawpni zan khan Laltlanchhuahi w/o Lallawmawma, Aizawl Dawrpui Vengthar chu a rinawmna avangin an inah chawimawina citation leh pawisafai an hlãn. Laltlanchhuahi te chhungkua hi Dawrpui Vengthar-a mi in luaha khawsa niin Canteen kual sachek zawrhna bula chhang siama ni tina inhlawh thin a ni a; July 27, 2017 khan a bul kawngpuia chanchinbu-a thil tuam chu hmuin a han chhar chuan cheng nuai khat lai a lo ni reng mai a. Pawisa neitu nena inzawng chhuakin a bo a bâng awm lovin a pe let leh vek a ni. Chawimawina hunah hian MNF Thalai President Er Lalrinawma, MLA chuan thu sawiin, “Cheng nuai khat hi a hman dan a zirin dinhmun inthlakthleng dawrh theihna a ni a, chutih laia rinawm taka a neitu inpe let thei hi thangtharte tan zirlai ropui tak a ni a. Tuna i thiltih hian thangtharte hnenah chi tuh sela kan duh avang leh i hming hi reh mai lovin sawi chhàwn zel ni se kan duh avangin chawimawina kan hlãn che a ni,” a ti