Aizawl: MNF Party chuan nimin zing khan Aizawl veng hrang hrang 10 - Zemabawk, Ramhlun, Chanmari, New Market, Tennis Court, Thakthing, Khatla, Vaivakawn leh Ramrikawn-ah te Furpui Campaign an nei a, heng hunah te hian MNF hruaitu ten thu an sawi. Khatla kawnah hian K.Sangthuama MLA chuan thu sawiin Congress party hian NLUP hi party mi leh sate duhsakna atan an hmang a ni, a ti a. NLUP chu CAG-in a endiknaah a hlawhchham nia sawiin, “CAG report hi thudik tak a ni a, Congress in dawt anga sawi phet an tum pawh hi sim rawh se,” a ti bawk. Zemabawk kawnah Lalruatkima MLA chuan thu sawiin, Zoram kalsual tur vengtu tur MPF office hial Congress mi leh sain an kalchilh chu pawi a tih thu a sawi a. “Miin thudik an sawi avanga nà kan ti zel dawn a nih chuan inenfiah hle kan ngai tihna a ni,” a ti. Er. Lalrinawma MLA pawhin Tennis Court tualah thu sawiin, sawrkarin kawngchhia tihngaihna a hre lo chu mak tiin, “Tuna kan kal dan chuan kawngpui that ngaihna a awm lo va, kalphung thar ti turin MNF kan inbuatsaih mek a ni,” a ti bawk.