ZALEN January 25, 2026: MNF party chuan Indian Airforce (IAF) hnena Lengpui ram hralh a nih dan chu CBI chhuitir an phut tih an puang a, ZPM sawrkarin CBI chhuitir an ngam ngei tura an ngaih thu leh an chhuitir lo a nih chuan mantang eitu zingah an tel ngei tihna a nih tur thu an sawi.

MNF treasurer leh MNF Publicity Board chairman ni bawk, Lalruatkima chuan nimin khan Aizawl Press Club-ah thuthar thehdarhtute kawmin IAF hnena Lengpui ram hralh a nih danah tlan paha chhiar theih khawpa langsar, nasa taka dan bawhchhiatna a thleng niin a sawi.

“Ram lak/hralh a nih tur thu sawrkarin dan ang taka hriattirna, Preliminary Notification a tihchhuah atanga ni 70 chhung lekin ram neitu dik tak pawh ni lo, a buaipuitute kutah Rs. vbc. 188 pek chhuah hman a ni a, ram lak kalpui chak ber record a nih a rinawm,” a ti.

Lalruatkima chuan Lengpuia ram neitu mi 8 te hmingin ram leina man, compensation/award hi siam a nih laiin, heng ram pariatte leikhawmtu nia insawi, Rohmingliana hnenah Aizawl DC Office chuan July 25, 2025 leh August 26, 2025-ah a belhkhawmin Rs. vbc. 70 a pe chhuak niin a sawi bawk a, a bak zawng Rs. 1,17,90,26,341 chu ram neitu ni ve miah lo, a buaipuitu nia sawi, Henry Lalremsanga Hlawnmual hnenah July 25, 2025 khan pek vek a ni a. Award/compensation siamna hming tumtu, ram neitu dik tak mi pariatte chuan cheng khat mah an chang ve lo thung niin a sawi bawk.

Hmanhmawh tak leh hnawhsarum taka hma lak a nih dan en hian sawrkar thuneitu sang atanga nawrna a na hle tih a chiang tih sawiin MNF treasurer chuan, “CM leh sawrkar thuneitute hi thuk takin an inrawlh ngei niin a lang,” a ti a. “Airforce ram tur leinaah hian dik lo taka hlawkna teltu, mantang eitu zawng zawngte chhui chhuak veka dan anga hremna lekkawh a nih ngeina turin CBI chhuitir kan phut tlat a ni,” tiin a sawi.

Hmanhmawh taka ram hralh a nih theihna tura Social Impact Assessment (SIA) kal kân phalna, exemption dilna pawmpui (approved)-tu chu Revenue Minister B Lalchhanzova a nih thu te, Preliminary Notitication May 15, 2025 khan tihchhuah a ni a, Lengpui ram hralh hi ZPM sawkarin a hriatpui a ni mai lo a, minister approval ngeia hralh tura hmanhmawh taka hmalak a nih thu te Lalruatkima chuan a sawi.

“Sawrkar ram lakna dan hnuaiah ram leitu chu sawrkar a nih zel avangin Lengpui ram hralhtu pawh hi ZPM sawrkar ngei a ni,” a ti bawk.

Lalruatkima thu sawi thenkhat

Hmanhmawh taka thil kalpui a nih avangin RFCTLARR Act, 2013 hnuaia ram lak anih dawna tih hmasak ngei ngei ngai, ‘Social Impact Assessment (SIA)’ pawh kal kan (exempt) a ni.

SIA kal kan phalna hi Land Revenue Minister B Lalchhanzova chuan May 15, 2025-ah khan a pawmpui (approved) chuk chuk a ni.

SIA kal kan phalna revenue minister in a pawmpui ni veka Preliminary Notification tihchhuah nghal rum rum a nih bakah Preliminary Notification hi danin a phut anga puanzar a ni lo a, a ram neitu Lengpui khawtlang hruaitute hriattir an ni lo a, chanchinbu-ah chhuah a ni bawk lo a, sawisel duh neite tana ni 60 chhung hun hawn thin pawh ni 15 lekah pawh tawi a ni.

ZPM party-in mi dang aia tha bik, dik bik leh fel bik tur a mipui hma a nasa taka an inzawrh hnuah Mizorama ram lei scam/scandal lian ber a lo thleng ta mai hi zahthlak kan tiin pawi kan ti.