Aizawl: Mizo National Front (MNF) Party chuan March ni 1,2016 atanga March ni 1,2017 inkar chhung hian Mizoram independence puan kum 50-na 'Golden Jubilee' an lawm dawn. Golden jubilee lawm tur chungchangah hian nimin khan khan Aizawl Press Club ah MNF hruaitute chuan chanchinbumite an kawm a, MNF Senior Vice President Tawnluia chuan, "Mizoten Politics-a kan tih theih sang ber zalenna suala hruaitu hmasa ten bul an lo tanna hi hre reng a, thangthar zelah Mizo Nationalism chi a lo intuh ngheh zel theih nan leh Mizo hnahthlak then hrana awm tawhte kan insuihkhawm leh theihna atan he ni hi urhsun taka lawm ni se tiin MNF Party chuan a rel a ni,” a ti a. Kum 20 zet zalenna suala an nunna hlantu Hnam Martarte pualin Remna Run Tlang, Luangmual ah Hnam Martarte thlanmual siam anih thu leh hming 1570 zet tarlan anih thu a sawi a. MNF Sr.Vice President chuan, " MNF in Independence puanga hnam zalenna nei tura an thawhna hi hnam movement dik tak, Mizo hnahthlak zawng zawng huap vek tu a ni a. He Movement avang hian khawvel leh India ngei pawhin Mizote hi hnam angin min hriat phah a ni," a ti bawk. Ruahman dan chuan naktuk Thawhtanni hian Mizoram Independence puan kum 50 hmanna atan two wheeler rally neih a ni dawn a. A lawmna pui ber chu March ni 1,2016 hian Vanapa hall-ah neih a ni ang a, MNF President Zoramthanga bakah zalenna puan laia hming ziaktu ten thu an sawi ang.