ZALEN February 27, 2026: MNF Treasurer Lalruatkima chuan March 1, 2026-a MNF-in Independence a puan kum 60 champha an lawmturah zalenna suala fehchhuak Hnam Pasaltha zawng zawngte zahna chibai he Diamond Jubilee lo thleng tur pual hian a buk a. Jubilee hman turah hian kal vek turin mipuite a sawm.

Lalruatkima chuan, "Mahnia ro inrela zalenna famkim nei tura, March 1, 1966-a Independence puan chu kumin March 1, 2026 hian a kum 60-na alo tling der tawh mai a. He Independence puan kum 60-na, Diamond Jubilee hi MNF chuan ropui takin a lawm dawn a. Kum tluanin, programme hrang hrang hmangin a lawmna hi hman tum a ni. Diamond Jubilee lawmna thupui atan hian, 'Zalenna sangber neih hi Mizote chanvo a ni,' tih hman a ni ang," a ti.

"Independence puan hriatreng leh mei mit lova chhawmnun reng hi Mizote kan tih tur a ni a, Hnam rilru putna atanga he mawhphurhna hi MNF chuan lain Mizo zawng zawngte lenna leh kimna turin Diamond Jubilee hi lawm a ni dawn a ni," a ti bawk.

March 1, 2026 hi Pathian ni a nih avangin, a tuk ni 2, March 2026 hian hemi puala Organising Committee dinin a rel angin Vanapa Hall-ah hman a ni dawn a. He hunah hian Mizo Hnam thinlung pu zawng zawngte chu kal vek turin an sawm a. Diamond Jubilee puala Lungphun hi Mizo Hnam Run kawtah phun a ni dawn a. Zoramthanga, MNF President-in a hawng ang. Jubilee lawm kharna hun chu nakum March 1, 2027 ah hman tum a ni..

A lawmna hun pui ber Aizawlah hman a nih rual hian MNF Sub-Headquarters, District Headquarters, Block leh Unit hrang hrangah te remchan dan anga hman a ni dawn a ni. Heng hmun hrang hranga hmannaah hian MNF General Hqrs. Hruaitu hrang hrangin an hmanpui anga, Jubilee lungphun te hawn nghal a ni hlawm dawn bawk a ni.

MNF Treasurer chuan, "Zofate hi thendarh a awm a, kumkhuaa hnam dang salbehna hnuaia awmreng hi thil nih dan turah kan ngai lova, mahnia ro inrel a, min Siamtu Pathian kaihhruaina hnuaia Zalenna sangber neih hi kan chanvo a ni tih hi kan pawm dan a ni a. A hun leh ni tur erawh Hnam a min dintu hian rem min la ruat sak ngei ang tih hi kan innghahna nghet tlat a ni," a ti.