Aizawl; Mizo National Youth Front (MNYF) chuan MNF-in Mizo thalaite hamthatna tura election manifesto-a a tar lante chu kum li chhungin a tihlawhtling vek tawh niin an sawi.

Nimin khan Aizawl Press Club-ah chanchinbumite kawmin MNYF Vice President Zodinpuia chuan MNF chuan kum 2018 Election Manifesto ah Mizo thalai leh zirlaite hmasawnna tur point 11 a chhawpchhuak tih sawiin, Covid-19 leng avanga ni 718 zet lockdown kalpui a nih avanga sawrkarin hna mumal a thawk thei lo chungin thalaite hamthatna tur hi an tihlawhtling vek tih sawiin, “Mizo thalaite MNF sawrkarin a ngaihsak a ni,” a ti a. “Eptu party leh mi thenkhat, sawrkar hmalakna sawi bawrhban tum a hmanhlelte avang hian MNF chuan Mizo thalaite hmasawnna tura ke a penna hi chawlhsan a tum lo a, theihtawp a chhuah zel dawn a ni,” a ti bawk.

MNYF vice president-in sawrkar hmalakna a tar lante chu - Thalai hna zawng employment exchange-a in-register tur ten awlsam zawka online hmanga an in-register theih nan Employment Exchange Portal thar, ‘EMPEX’ chu buatsaih a ni.

LESDE Department hnuaiah Mizo thalaiten eizawnna ngialnghet an neih theihnan Recognition Prior Learning Programme kalpui a ni a. Thalaiten thiam thil chi hrang hrang an zirna tur Govt ITI Aizawl, Lunglei leh Siaha a kan neih bakah Champhai, Serchhip, Thingdawl leh West Phailengah te ITI thar dinna tur building sak mek a ni.

Kum 2021 atang khan Mizo thalai thiam thil neiten an thilsiam chhuah hmang a intihsiakna leh intawhkhawmna, PUM (Innovation Fair) buatsaih thin a ni a. ITI atanga zir chhuak thalaiten bul an tan na turin KAWTCHHUAH (Start-Up Fair) chu kum 2022 atangin buatsaih tan a ni.

Mizoram sawrkar in Mizo thalaite World Skills Competition a an tel ve theihna turin inbuatsaihna a kalpui mek. Mizoram Youth Commission (MYC) office changtlung tak, mahni a building hran nei a siam a ni. Thalai hna zawng mek te leh hnathawktu tur mamawh ten awlsam tak a an inhriatpawh zung zung theihna turin MYC chuan HNAINPUI.COM (On-line Job Portal) chu Internet, Android apps leh IOS apps te buatsaih a ni. Mizo mipuite rualawhna phuhru turin kum 2022 – 2023 atan Super IAS 40 kalpui leh a ni. 

Kum 2020 atang khan MYC chuan Lunglei ah Coaching Programme a hawng tawh a, District Capital dang Siaha, Kolasib leh Champhai lamah te pawh Coaching Centre hi hawn belh a ni bawk. Mizo ṭhalai SSC/IPBPS exam hmachhawn tur te tan coaching class Aizawl leh Lunglei ah kalpui a ni.