Aizawl March 28, 2023 : MNF chuan March 29-a Lunglei Municipal Council(LMC) inthlang tura campaign hun chhung zawng Lunglei mipuiten dawhthei taka campaigner te an lo dawnsawn avang te, an thu sawi te tha taka an lo ngaihthlak sak avangin lawmthu an sawi a, an candidate tur te vote turin an ngen bawk.

MNF chuan, "Election Commission-in campaign hun theih chhung a siam chu 27.3.2022  khan a lo tawp ta a, campaign hun chhung zawnga political party hrang hrang te, Lunglei mipuiten dawhthei taka campaigner te in lo dawnsawn a, an thu sawi te tha taka min lo ngaihthlak sak avangin lawmthu kan sawi a. Chutihrualin, induhloh zawng khawimaw laiah lo ti palhte pawh an awm thei, chung zawng zawngah pawh chuan in mi hriatthiamna kan han dil nghal bawk e," an ti. 

MNF thuchhuak chuan, "Kum 2018 MLA inthlan dawn khan MNF auhla lian ber pakhat chu, Lunglei khawpuiin kawng hrang hranga hma a sawn theih nan Lunglei Municipal Council(LMC) din a tiam a. Pu Zoramthanga kaihhruai MNF sawrkar chuan Leitlangpui tan Municipal Council dinna tur a duang nghal a, January ni 13, 2023 khan Pu Tawnluia, Dy. CM hoin LMC Pisapui hi hawn a lo ni tawh a ni," an ti.

Ngenna siamin MNF chuan, "LMC inthlan hmasa ber lo awm turah hian, Lunglei mipuiten hmasawnna kawtchhuah in chuanchhuah ngei theih nan LMC dintu, State a sawrkar lai MNF party candidate te, hnathawk thei tura min lo thlantlinsak vek turin kan ngen tak meuh a che u," an ti.