Aizawl: MNF Party chuan NIAS chungchanga bang tura an phut LE&IT Minister Lalrinmawia Ralte leh MYC Chairman T.Sangkunga te pisa pai theilo tura an dan chu naktuk atangin chawlhsan an tum. Hetih lai hian naktuk chawhma dar 11 hian ACCJSU chuan 'Zirlaite thlavang hauhna kawngzawh' neih an tum thung. Nimin khan Hnam Run ah MNF Action Committee chu an chairman Tawnluia hovin an thukhawm a, Nalanda Institute of Advanced Studies (NIAS) chungchang sawiin NIAS enfiah tur hian Mizoram sawrkarin Official-te vawi thum (March 2016, May 2016 leh January 2017) lai a lo tir tawh chunga sawifiah pui tur kaichhan sawma zuk enfiah tir a tum leh chu sawrkar mualphona ah an ngai tih an sawi a. NIAS chungchangah LE&IT Minister leh MYC Chairman te chu a mawhphurtu an nih angin an bang ngei tur a ni tih chu an dinna a la ni reng tih an sawi. Zalen thudawn danin MNF kalzel dan tur hi naktuk Hnam Run chhung inkhawm ah party hruaitu ten an puang dawn a ni. Hetih lai hian Aizawl khawpui College hrang hranga zirlai intelkhawm Aizawl City College Joint Students Union (ACCJSU) chuan nimin khan Aizawl Press Club ah chanchinbumite kawmin an zirlaipui te chu mi tuten emaw NIAS ah hian sum siamnan an hmang nia an hriat thu sawiin zirlai ten sum leh pai, tha leh zung an sen tawh zawng zawngte phuhruk tura zangnadawmna pe turin Mizoram sawrkar an phut tih an sawi. ACCJSU President Zodinsanga chuan, "NIAS zirlaiten harsatna leh manganna an tawh chungchangah a tuartu zirlaite tha taka lo dawnsawn ahneka zirlai awm tha duh lo leh thatchhe lailet der anga kan ram hruaitu thenkhat te’n an lo chhuah hi Mizo zirlaite hmuhsitna dik takah kan ngai a, ngaihdam dil ngei turin kan phut a ni," a ti. ACCJSU hian naktuk chawhma dar 11 hian Sikulpuikawn leh Chanmari kawn atanga kawngzawh tanin Vanapa Hall kawtah intawhkhawm an tum.