Aizawl: Nimin khan Aizawl West-I MNYF te chuan J. Lalchhanhima In, Zonuam-ah ‘Political Training cum Retreat’ an nei a, bialtu MLA K. Sangthuama leh Er. Lalrinawma, MNYF President ten an hmanpui. Thu sawiin MLA K. Sangthuama chuan, “Congress sawrkarah kawng a chhia a, gas an nei lo va, buhfai an nei lo va, chini an nei lo va, khawnvartui an nei lo va. Mipui hi kan phunchiar lo zawk ngawt a ni. Kum 10 dawn an sawrkar hnu hian ram rotling hna thawh an neih sawi tur a vâng hle a. MNF te chuan kum 10 kan sawrkar chhungin PMGSY atangin km 2000 chuang kawng kan lai a. Lunglei-Aizawl kawng km 230 khan km 170-ah kan kaitawi a ni,” a ti. Sangthuama chuan Aizawl khawpui MLA bial 11 chu MNF in lak vek a tum niin a sawi bawk. Thusawitu dang Er. Lalrinawma, MLA chuan, “Ram siam tak tak tur chuan ram neitu nihna thinlung kan neih a ngai a. Politics hi ram hmasawnna (development) nen a inkungkaih tlat a ni,” a ti bawk.