ZALEN October 22, 2023 : Zoram People’s Movement Party (ZPM) chuan rorel lai, MNF party chu Socio Economic Development Programme (SEDP) hmanga mipui bumah an puh.

Aizawl Press Club-ah chanchinbu mite kawmin ZPM General Secretary Eddy Zosangliana chuan, “Kum 2018 inthlan dawn khan tuna sawrkar kan hrawn lai mek, MNF party hian mipui hnena an inzawrhna pui ber leh an tlinna chhan ber nia ngaih chu an flagship programme, SEDP kha niin chhung tin hnena Rs. nuai 3 sem an intiam a.

Tunah chuan an term a lo tawp dawn ta a, kum nga chhungin chhungkaw tlem tê hnenah Rs. 25,000 tete-in an pe thei tawk a. MNF party hian SEDP hmangin Zoram mipuite hi chiang takin min bum a ni,” a ti a. Kum 2018-a an inzawrhna an flagship programme berah pawh an hlawhchham chian em avangin kumin 2023 inthlan turah chuan policy mumal sawi tur pawh nei ngam tawh lovin ZPM leh an leader, Lalduhoma beih chu an policy pui ber a ni ta niin a sawi.

MNF party President Zoramthanga’n a sawi rik ve fo thin ‘MNF hi hun tha lo leh hun harsa atan Pathianin min lo hungchhuak thin’ tia a sawi chu sawifiahin, “Hun harsa leh hun tha loah MNF party hi Pathianin a hung chhuak thin ni lovin, MNF an sawrkar apiangin Mizoramin harsatna a tawk thin zawk a. Hei hian ram enkawlna kawngah an hlawhchham chianzia a lantir chiang hle a ni,” a ti a. MNF sawrkar apiangin dan phal loh a sumdawnna (smuggling) leh damdawi ruih theih a hluar niin a sawi bawk a. MLA inthlan lo awm leh turah chuan ZPM leh Congress chu inbei tur nia sawiin tun MLA inthlanah erawh MNF chu an khingpui ber an ni dawn niin a sawi bawk.

ZPM sawrkarah chuan mipui sawrkar an din dawn tih sawi bawkin, “ZPM MLA candidate, ei ru lo tura intiam ngam thah 40 rualte kaihruaitu tur ZPM leader hian a unaute pawisa a kawlsak ve mai mai dawn lo tih kan chiang a. Lalduhoma kaihhruaina hnuaiah hian sawrkar thar, mipui sawrkar din a ni ang a, party bil induhsakna a bo ang a, a hun taka sawrkar hnathawk hlawh lak theih lohte a awm ve lo vang a, Mizoram hi kan thlak danglam dawn a ni,” a ti bawk.