Aizawl: Mizo National Youth Front (MNYF) chuan nimin khan ‘Vangpui Fehchhuah’ beihpui a thlakna kal mekah Serchhip bazarah hun an hmang leh a, MNF Thalai President Er. Lalrinawma leh Dr. K. Beichhua, MLA te'n thu an sawi a ni. Er. Lalrinawma chuan, “Sawrkarin world class education neih tumin hma a la a, sawrkar sikulah zirlai an tlem tial tial thung a, hei hian ruahmanna a that tawk lohzia a tilang a. MNF kan sawrkar chuan zirna tha zawk kan neih theih nan transfer & posting rules mumal tak nei turin hma kan la dawn a ni,” a ti. Dr. K. Beichhua pawhin, “Vawiin niah kan ram a dam lo va, sawrkarin zu a zawrh atangin drugs man Rs. 500 ni thin kha Rs. 150-in lei tur a awm tawh a. India rama HIV/AIDS vei tamna ber kan ni hial a. YMA information centre atanga mitthi an puan zingah pitar putar aiin thalai kum 20-40 an tam ber tawh a ni,” a ti a. “Africa rama Swaziland ram khu AIDS vanga thalai thi an tam avangin mi pakhat dam hun chhung chawhrual chu kum 38 chauh a ni a; vawiina kan sawrkar pawhin hetianga min kaihhruai zel chuan Swaziland ram ang kan ni ang tih a hlauhawm hle a ni,” a ti. Dr. Beichhua chuan MNF-in sawrkarna a siam chuan health care scheme tha leh changtlung zawk a neih tur thu a sawi bawk.