Aizawl: MNF Party chuan State Transport Authority in eizawn nana lirthei hman theih hun chhung a bithliah chu mi rethei leh harsa te hmuhsitna a ni tiin sut leh turin sawrkar an phut. Nimin khan Aizawl Press Club ah MNF Vigilance Department chuan thuthar lakhawmtute kawmin an chairman R.Tlanghmingthanga chuan sawrkar in eizawn nana hman lirthei chi hrang hrang Bus, taxi, Two wheeler, 3 wheeler, Maxi cab leh Bus te hman theih hun chhunga bithliah chu an party chuan a dodal tih a sawi a. "Motor chu eng anga fit leh tling pawh nise sawrkar kum bithliah a tlin tawh chuan KM tlemte chauh la tlan pawh nise tihluihnaa thlak ngei ngei tur a ni a. Sawrkarin kum 15 atan road tax a la sauh sauh a, Motor hi eizawn nan kum 8 emaw kum 10 bak a hman tlak loh sawrkarin a ti leh si hi rorelna mak leh runthlak ber, lirtheia eizawngtute rawkna dik tak a ni," a ti a. An party chuan kum bithliah awm lovin MVI lamin a fit an tih chhung chu tlantir nise an duh tih a sawi. Taxi intlanchhawk tir an ni pawh mihring dikna chanvo palzutnaah an party chuan an ngai tih R.Tlanghmingthanga chuan a sawi bawk a. "Tuna sawrkar thuchhuah ang chuan Taxi leitu leh khalhtute chuan kum 10 chhung chhiah engkim pe vek si khan kum 6 leh thla 8 chiah an tlan dawn tihna a ni a. Hei hi lirtheia eizawngte rahbehna leh diriamna dik tak a ni a, MNF Party chuan siam tha vat turin sawrkar kan phut a ni," a ti bawk. %%%%%%