ZALEN November 1, 2023 : MNF chuan ZPM-in Central atanga pawisa cheng Vaibelchhe 2563.17 hmuhbelh an tih chu thu belhchian dawl lo a ni an ti a, Central atanga COVID puala Central atanga tanpuina kan hmuh chu Rs. 79,62,88,000/- vel bak hi a ni lo. RTI hmanga zawhna Finance dept. chhanna a Central atanga hmuh loh pawh Rs. Vbc 2636.52 ni lovin Vbc. 2632.58 a ni zawk, an ti.

MNF chuan, "ZPM thuchhuah in a sawi kan hmuh belh hi chu Share of taxes atanga kan hmuh belh a nia, heng hi chu Sorkar hnathawk hlawh leh Pension lawmman ni 1.9.2018 atanga 7th pay sawrkar in a pek punna kum tin senbelh pawh a daih lo a ni. Heng bakah hian District Head Quarters 3 function na leh tih changtlunna vaibelchhe tam tak a awm a, Refugee mi 50000 vel kan kawl reng bawk a. Pawisa hman tur kawng hrang hrang a tam em em a ni. ZPM hian Share of taxes a kan hmuh belh an sawi lar hle laiin, Post Devolution Defisit Grant (PDRDG) a kum tin kan hmuh tlem erawh an sawi lang duh leh miah si lova. ZPM thuchhuah hi thu belh chian dawl lo a ni," an ti.

MNF General Secretary P.C. Laldinthara chuan, "RTI chhanna, COVID avanga sum kan hmuh loh hi ni 30.6.2021 thleng chauh chhan a nia, a hnulamah COVID hri a la leng nasa hle a, hemi piah lama kan hmuh loh leh Covid avanga State own tax leh Non-tax Revenue lak theih loh nen chuan Rs. Vbc 3000 a chuang daih ang tih thin a ni," a ti.

MNF GS chuan sawrkar hnathawk hlawh chungchang sawiin, "Nimin lamah Sawrkar hnathawk hlawh Inthlan zawh hmaa pek hman loh thu a darh a, hei pawh hi tunhnaia thil kalphung pangngai niin, sum harsatna avanga Central atanga thlabi-a kan sum hmuh thin, kan hmuh tlai thin avanga thla tin ni 10 bawr vela hlawh hi pek chhuah thin a ni ta a. Inthlan dawn hnaih avanga thuthar sawngbawl a tih thar hluai tur chi a ni lo. Heng thil avang te hian mipuite chiai lo turin kan inngen a, Pathian leh mipui zara kan sawrkar leh anih chuan theihtawp chhuahin, sum a harsatna kan tawh mek hi sutkian chhoh zel kan tum tlat a ni," a ti.