ZALEN October 19, 2025: MNF chuan nimin khan Aizawl Press Club-ah chanchinbumite kawmin October 29, 2025-a Mizoram pum huap total bandh neih an tum chhan an sawifiah a. MNF Legal Board Chairman C.Lalramzauva chuan, “Forest (Conservation) Amendment Act (FCAA), 2023 hi kan pawm a nih chuan hemi chungchanga state sawrkar thuneihna hi central sawrkar kutah kan hlan vek tihna a ni a. Rules leh guidelines lo chhuakah pawh thuneihna tâwp chu central sawrkar kutah liau liau dah a ni zel a, hetiang dinhmun hi Mizo mipuite tan pawm theih chi a ni lo,” a ti.

MNF legal board chairman chuan FCAA, 2023 chu India Danpui Article 371G(a)(iv)-a ‘Ownership & transfer of land’ nena sawikawp chi a ni lo ti zawnga tan lo late pawh an awm ngei tih sawiin, “Amaherawhchu, ‘forest’ (ramngaw) hi leilunga inphun nghet tlat a nih avangin ramngaw hi a tona leh innghahna leilung nen sawi hran theih a ni lo a. Kan ramngaw min thiahsakna tur dan central sawrkarin a siam hi danpui Article 371G hmang chauh lo chuan dan theihna tur hmanraw dang kan nei lova.

“Ramri atanga 100km bialah forest clearance lak a ngaih tawh dawn loh avangin, ram venhimna, ‘national importance’ leh ‘national security’ tih chang chawiin, an duhna hmun apiang, ramngaw emaw, ramngaw lo pawh awlsam tein min chhuhsak thei tawh dawn a ni. Kan ram hi ramri (international boundary) atanga 100km huam chhungah a awm vek avangin kan ram rohlu neih chhun tichhiain a tizim dawn a, Pathianin chenna tur ram min pek chhun hi kan chân zel dawn a. Chu tak chu he FCAA, 2023 hi Mizoramah kan hman ve lohna chhan tur chu a ni,” a ti.

FCAA chungchanga an hmalakna sawiin C.Lalramzauva chuan, "ZPM sawrkarin official resolution siama FCAA, 2023 a lo pawm tak chu MNF Party General Hqrs. chuan nasa taka dodalin, thiah leh a nih ngei theih nan Assembly Speaker hnenah ngenna ni 03.09.2025 khan kan lo thehlut tawh a. Assembly Speaker chuan a tul anga ngaihtuah zui a nih theih nan House Leader pawh a lo sawipui tur thu a sawi nain tun thlengin chutiang zawnga hmalakna engmah hmuh leh hriat a ni ta lo a. Hetih lai hian Jt. Civil Society (Central YMA, MHIP, MPCC, MNF, PC, Mizoram Transformation Movement, Centre for Environment and Social Justice, Mizoram First, CATAJ, ZORO, Mizoram Environment NGO 12-te) ten nasa taka ZPM hmalakna chu sawiselin ni 11.09.2025 khan kawng hial zawhin FCAA, 2023 pawmna sut leh turin an lo ngen tawh a." 

"Hemi hnuah pawh hian Central Young Lai Association (CYLA) te pawhin FCAA, 2023 hian nasa taka ram mipuite pawi a khawih theih dawn avanga an dodal thu a lo puang tawh bawk a ni. Mahse mipui ngenna bengkhawn lova sawrkarin tan an la khawh luih tlat avangin MNF Party Gen. Hqrs. Executive Committee Meeting ni 07.10.2025-a neih chuan Mizoram pum huap Total Bandh chu 29.10.2025 ah hreh tak chungin huaihawt a lo rel ta a ni," a ti.

Zawhna chhangin MNF legal board hotute chuan session-ah khan he bill pass chungchangah an MLA te chu an ngawi (abstain) a, an abstain vang khan an pawmpui tihna a ni lo tih an sawi bawk.