ZALEN January 14, 2026: Mizo National Front chuan March ni 1, 1966-a Zalenna puang a, Mizoram in Zalenna famkim a neihna tura a beihna champha kum 60 na chu kumin March 1, 2026 hian an lawm dawn a. Hemi ni hi Pathianni a nih a vangin a lawmna hun March ni 2, 2026 hian Vanapa Hall-ah an hmang dawn. 

Hemi atana Celebration Committee a din, MNF Sr. Vice President Dr. R. Lalthangliana kaihhruai chu January 13, 2026 thawhlehni khan Mizo Hnam Runah a tum hnih nan thukhawmin ruahmanna hrang hrang an siam a. Sub Committee peng te hmalak tawhna leh ruahmanna an siam mek report ngaihthlak a ni. Mizoram Independence puan Diamond Jubilee hi March 1, 2026 ah a lawmna hawnna neih a ni ang a, kumtluana programme hrang hrang neih tum niin, a kharna hun hi March ni 1, 2027 ah neih tum a ni. Kum khat chhung kum tluana lawmna thupui atan, 'Zalenna sang ber neih hi Mizote chanvo a ni' tih chu hman a ni ang.

A lawmna hunpui ber hi Aizawl-ah neih a ni ang a, hemi bakah hian MNF Sub Headquarters, District Headquarters, Block hrang hrangah te a remchan dan anga hman tura ruahman a ni bawk.

Hemi hriatrengna Lungphun Mizo Hnam Run sira phun chu March 1, 2026 hian hawn tura buatsaih mek a ni a. MNF President Zoramthanga'n a hawng ang.