Aizawl June 19, 2024 : MNF chuan Bangladesh-a Zohnahthlak ten buaina nasa tak an tawh vanga Mizorama raltlana rawn lut nunau 200 chuang, Mizoram an rawn luh tawh hnua BSF-in an thawhlet leh hi pawi an ti a. Heng nunaute hi Bangladesh-a an khuaa let leh ngam tawh lovin ramhnuaiah khawchhe karah an tangkhang mek a. An zingah naupang leh kum upa thahnem tak an tel a, pawi an ti.

Hetianga kan unauten harsatna nasa tak an tawh laia Mizoram sawrkar a ngawi tlat chu MNF chuan pawi an ti a. An nunna atana sahimna zawnga rawn luh tum zohnahthlakte hi ngaihtuah hram turin sawrkar an ngen a. Zohnahthlak ram hrang hranga thendarha awmte tan In pui a nih chhunzawm theih nan sawrkar hian ngaihtuahna hmang se an duh.

"MNF sawrkar lai khan Bangladesh Zohnahthak harsatna tawkte hian Mizoram an rawn pan a. BSF-in lo dangin harsatna nasa tak an lo siam a. Khatih laia Chief Minister Zoramthanga khan, 'Kan unaute dan kan remti lo. Nangni pawhin in Bengali pui Bangladesh atanga India an rawn lut tur in dang bik lo,' tiin tan a khawh a. Mizoramah thahnem tak an rawn raltlan a, chhawmdawlna pawh hahnem tak pek an ni. Tun sawrkarah kan unauten harsatna an han tawk a, sawrkar a ngawi tlat hi hriattiam har kan ti hle a ni," an ti.

Zohnathlak te tuamhlawm a, kuahkhawmtu an ni thei ngang lo a nih pawhin, a lengdarhtu ni lo hram turin ZPM sawrkar hi MNF chuan an ngen bawk a ni.