ZALEN January 22, 2025 : MNF chuan kawng siamna tura tuialhthei man chhiah tihpunna sum tlingkhawm chu a hmanna tur dik tak, Truck tlan ngamna tura kawng siamthat nana hmang nghal turin Chief Minister Lalduhoma kaihruai sawrkar an ngen a. An insawi ang ngeia mahni inhaivur hmasa lova ram tan hnathawk hmasa turin an chah nghal bawk.

PWD Minister berin kawng siamna tura pawisa awm thu a sawi reng lai te, kha leh chen ruahtui tlak loh leh khaw that hun pawha he lai kawng hi siamthat tum si lo; January ni 20, 2025 atang chauha Vairengte leh Sairang inkar kawng siamtha tura Mizoram PWD-in hma a la tan chauh chu MNF chuan sawrkar inthlahdah lutuk avanga che tlaiah an ngai.

PWD Minister chu chak taka hma la a, kawng chhe laite siamtha nghal zung zung turin an phut a. "Kawng siamna tura tuialhthei man uchuak taka chhiah an tihpunna sum tlingkhawm pawh a hmanna tur dik tak, Truck tlan ngamna tura kawng siamthat nana hmang nghal turin Chief Minister Lalduhoma kaihruai sorkar kan ngen a. An insawi ang ngeia mahni inhaivur hmasa lova ram tan hnathawk hmasa turin kan chah nghal bawk a ni," an ti.

Mizoram Truck Owners' Association (MTOA) General Headquarters leh Mizoram Truck Drivers' Association (MTDA) General Headquarters-te chuan naktuk January ni 23, 2025 atanga Mizoram ei leh bar chawkluhna kawngpui ber Vairengte to Sairang kawng chhiat lutuk avanga an tlan ngam tawh loh tur thu chhuah an siam hi MNF chuan lungchhiatthlak a ti a. Mizoram sawrkar inthlahdah vangah ngaiin, sawrkar chu a rang thei ang bera kawng chhiate siamtha thuai turin an phut.