ZALEN Nov. 6, 2025 : MNF party Legal Board chuan chief minister Lalduhoma chu Model Code of Conduct (MCC) bawhchhia-ah puhin, Chief Electoral Officer (CEO) hnenah complaint an thehlut.

Vawiin (6.11.25) a thuthar thehdarhtute an kawmnaah MNF Legal Board hruaitu Saihmingliana Sailo chuan, ni 1.11.2025 chief minister Lalduhoma'n ZPM party tana Silsury a campaign naah MCC leh dan dinglaite nasa taka bawchhiaa, Mizoram chhung ngeia chi leh chite inkara in huatna chawk chhuak thei thil a sawi chiam mai kha MNF party chuan pawi a ti hle tih sawiin, CM berin, tlin duh luat vanga dan a pawisa miah lo hi thil pawi tak a nih avangin an en liam mai dawn lo tih a sawi.

Hei bakah hian hemi ni vek hian CM hian mipuite chu an party candidate an vote loh chuan sawrkar atanga hamthatna an hmuh turahte hrekah a vau bakah, hamthatna chi hrang hrangte tiamin Silsury road/kawng siaman tur Rs. Vbc. 100.40 dah fel a nih tawh thu leh kawng tha siamsak an nih tur thute bakah, kawngpui, border trade, CM special package, mirethei in sak tanpuina leh an mamawh dangte pek an ni dawn tiin a sawi, tih Saihmingthanga Sailo chuan sawi bawkin, heng a thu sawite hian MCC chiang takin a kalh niin a sawi bawk.

"CM berin dan chunga leng nia inngaia dan pawisakna chhe te mah nei loa a chet vel avang hian vawiin 6.11.2025 hian CEO hnenah hmala tura ngenna/complaint kan thehluh a ngai ta hi vanduaihtlak kan ti hle," a ti bawk.

#ZalenNews